रौतहट। संघीय हिन्दु लोकतन्त्र प्रमुख एजेन्डा सहित राष्ट्रिय समता पार्टी नेपाल घोषणा गरिएको छ। रौतहट जिल्लाको दुर्गा भगवती गाउँपालिकामा आज हजारौँको जनसहभागिताकाबीच सो पार्टी घोषणा कार्यक्रम गरिएको हो।
अयोध्या श्रीरामलला मन्दिर प्राण प्रतिष्ठाको प्रथम वार्षिकोत्सवको अवसरमा आज उक्त पालिकाको वडा नं २ भलोहियास्थित श्रीराम जानकी मठ परिसरबाट व्यापक उपस्थिति सहितको उल्लासमय वातावरणमा निकालिएको बृहत शोभा यात्रा पश्चात् पार्टी घोषणा कार्यक्रम गरिएको सो पार्टीका केन्द्रीय अध्यक्ष विजयप्रकाश निषादले जानकारी गराए ।
उनका अनुसार , “हजारौँ नागरिकको जन सहभागितामा आज हामीले पार्टी राष्ट्रिय समता पार्टी नेपाल घोषणा गरेका छौँ । जनतालाई गाँस बाँसको व्यवस्था तथा पीडित नेपाली नागरिकको सहयागका विषयमा हामी आवाज उठाउने छौं।” पार्टीले आफ्नो अभियान गाँजा खेतीलाई प्रोत्साहन गर्नुपर्छ, जनतालाई गाँस बाँसको व्यवस्था र राष्ट्रिय समता पार्टी नेपालको सरकार आयो भने मेडिकल, पर्यटन र एजुकेसन टुरिजमलाई हामी नेपालमा स्थापित गर्ने, एक वडा व्यवस्थित विद्यालय र एक पालिकामा कम्तिमा पनि ५० शैयाको अस्पताल आफ्नो पार्टीले व्यवस्था गर्ने अध्यक्ष निषादले जनाए ।
सो पार्टीका राष्ट्रिय अध्यक्षमा विजयप्रकाश निषाद, वरिष्ठ उपाध्यक्ष विशाल झा, महासचिव डा.अभिषेक तिवारी, प्रवक्ता अधिवक्ता रणवीर कुशवाहा, केन्द्रिय प्रशिक्षण विभाग प्रमुख पं.श्रीनन्दन भारद्वाज, मधेस प्रदेश अध्यक्ष विवेक शाह कानु रहेका छन्। यसका साथै पार्टीका केन्द्रीय सदस्यहरुमा रौतहट जिल्लाको प्रेस विभाग प्रमुख उमेश सराफ र साधुसन्तहरु समेतको उपस्थितिमा दुर्गा भगवती गाउँपालिका रौतहटमा पार्टी अध्यक्ष अथर्मेन्द्र महतो ज्यूको अध्यक्षतामा हजारौँ हजारको बृहत उपस्थितिमा पार्टीको घोषणा गरिएको थियो। पार्टी घोषणा समारोह दुर्गा भगवती गाउँपालिकाको अध्यक्ष अथर्मेन्द्र महतोको अध्यक्षतामा सम्पन्न भएको थियो।
कार्यक्रममा हजारौँ स्थानीय नागरिकहरूको उत्साहजनक उपस्थिति रहेको थियो । राष्ट्रिय समता पार्टी नेपालले संघीय हिन्दू लोकतन्त्रलाई प्राथमिकतामा राख्दै समतामूलक समाज निर्माणका लागि काम गर्ने लक्ष्य लिएको जनाइएको छ।
