काठमाडौं । टुगेदर फर चेन्ज, टुगेदर फर हेरिटेज भन्ने मूल नाराका साथ नव वर्ष २०८३ र २५७० औं बुद्ध जयन्तीको अवसरमा हामी छौं समाज नेपालद्वारा आयोजित ‘मैती सोसियल रन ८३’ दौड सम्पन्न भएको छ ।
३ किलोमिटर लामो सामुदायिक दौड कार्यक्रम स्वास्थ्य, एकता र सामाजिक जागरुकता प्रवर्द्धन गर्न विभिन्न उमेर समूहका धावकहरूको उत्साहजनक सहभागितामा थियो ।
खुल्ला पुरुषतर्फ गौरव तण्डुकर ११ मिनेट ४७ सेकेण्डमा पहिलो, प्रमेश मालाकर दोस्रो (१९:४८) र हिमेश शाक्य (१२:३३) तेस्रो भएका थिए । खुल्ला महिलातर्फ सबिना विष्टले १४ मिनेट २६ सेकेण्डको समयसहित पहिलो हुँदा सुनिता राईः रजत र बिभा गुरुलेङ कांस्य पदक जिते ।
कार्यक्रमका संयोजक प्रकाश ज्योति बज्राचार्यले यो सुरुवात मात्र भएको र भविष्यमा अझ ठूला र राम्रो कार्यक्रमहरू आयोजना गर्न तयार रहेको जनाए ।
त्यस्तै हामी छौं समाज नेपालका अध्यक्ष राजा राम कपालीले यो कार्यक्रमले स्वस्थ, थप एकताबद्ध र सामाजिक रुपमा जिम्मेवार समुदाय निर्माण गर्ने साझा प्रतिबद्धतालाई प्रतिबिम्बित गर्ने जनाए ।
कार्यक्रममा प्रमुख अतिधिको रूपमा उपस्थित काठमाडौँ महानगरपालिका वडा नं. ३० का अध्यक्ष दलबहादुर कार्कीले यस कार्यक्रमको प्रशंसा गर्दै यस्ता अर्थपूर्ण समुदाय संचालित गतिविधिहरूको निरन्तरतामा जोड दिए ।
यसै अवसरमा पहिलो कपिलवस्तु आइरोनम्यान वुमन्स नेशनल स्ट्रेन्थ लिफ्टिङ एण्ड आईबीपी च्याम्पियनसिप २०८२ मा स्वर्ण पदक र एनबीएम पावरलिफ्टिङ २०८१ मा रजत पदक विजेता उपान्त्य महर्जनलाई सम्मानपत्र पनि प्रदान गरिएको थियो ।
