एजेन्सी । के तपाईंलाई थाहा छ कि हिल्सको डिजाइन महिलाको लागि नभइ पुरुषको लागि बनेकाे थियो ।
यो कुरा सुन्दा पत्यार नलाग्न सक्छ, तर सत्य हो । हिल्सको इतिहास निकै रोचक छ र यसले समयसँगै बदलिँदै गएको सामाजिक र सांस्कृतिक मापदण्डहरूलाई देखाउँएकाे छ ।
हिल्सको इतिहास १०औं शताब्दीबाट सुरु भएको थियो । सुरुमा हिल्सको प्रयोग पर्सियन घोडसवारहरूले गर्थे । घोडाको पिठ्युँमा बस्दा उनीहरूलाई आफ्नो खुट्टालाई स्ट्रीपमा स्थिर राख्नको लागि हाई हिल्स भएका जुत्ताको आवश्यकता पर्थ्यो । यो डिजाइनले उनीहरूलाई घोडचढीको क्रममा सन्तुलन कायम राख्न मद्दत गर्थ्यो । विस्तारै यो प्रचलन युरोपसम्म पुग्यो र १६औं शताब्दीमा पुरुषहरूको फेसनको अंश बन्यो ।
१७औं शताब्दीको अन्त्यतिर हिल्सको प्रचलन महिलाहरूमा पनि फैलिन थाल्यो । यस अवधिमा, महिलाहरू पुरुषहरूको फेसनबाट प्रेरित भएर हिल्स लगाउन थाले । यो प्रचलन विशेष गरी युरोपमा देखियो, जहाँ महिलाहरूले आफ्नो पहिरनमा पुरुषहरूको पोसाकहरू समावेश गर्न थाले । यद्यपि १८औं शताब्दीमा पुरुषमा हिल्सको प्रचलन घट्यो, तर महिलाको लागि यो फेसनको एक महत्त्वपूर्ण अंश बन्यो ।
१९औं र २०औं शताब्दीमा हिल्सले महिलाहरूको फेसनमा एक नयाँ पहिचान बनायो । यो महिलाहरूको आत्मविश्वास र सशक्तीकरणको पनि प्रतीक मानिन थाल्यो ।
फेसन डिजाइनरले हिल्सलाई विभिन्न डिजाइन र आकर्षक रूपमा प्रस्तुत गरे, जसले गर्दा यो महिलाको लागि एक आवश्यक एक्सेसरी बन्यो ।
