काठमाडौं । कीर्तिपुर नगरपालिका वडा नं. ६ का वडा अध्यक्ष खिरमान सिंह बस्नेतलाई चोभारको न्हसिकाप गल्छीको विषयमा सिफारिस रद्द गर्न माग गर्दै कीर्तिपुरमा क्रियाशिल नेवाः जातीय संघसंस्थाहरु र नेवाः देय् दबू साथै सांस्कृतिक अभियन्ताहरुले निवेदन दिएको छ ।
असार २६ गते विहिवारका दिन वडा कार्यालय क्वयनामा पुगी वडा अध्यक्ष बस्नेतलाई निवेदन दिएको हो ।
कीर्तिपुर नगरपालिका वडा नं. ६ बाट गत २०८१ साल फागुन २० गते दिएको सिफारिसको आधारमा चोभार गल्छीमा अवरोध हताउने र सेना परिचालन गर्ने सरकारले निर्णय गरेपछि सो विषय विवादमा आएको हो ।
उक्त विवादलाई दीर्घकालिन रुपमा नै समाधानका लागि र गल्छी न्हसिकापको मौलिता, ऐतिहासिक, सांस्कृतिक, धार्मिक र प्राकृतिक महत्वलाई पनि संरक्षण गर्नका लागि पनि उक्त सिफारिस रद्द गर्नुपर्ने पत्रमा उल्लेख गरिएको छ ।
उक्त सिफारिस रद्द गरि रद्द भएको ब्यहोरा सम्वन्धित पक्षलाई लिखित रुपमा दिन समेत माग गरिएको छ । सो क्रममा वडा अध्यक्ष बस्नेतले आएको निवेदन वडा समितिको बैठकमा पेश गर्ने र जनभावना अनुसार नै आफू अघि बढ्ने समेत बताउनु भयो ।
नेवाः देय् दबू कीर्तिपुर नगर समितिको पहलमा भएको उक्त निवेदनमा नेवाः देय् दबू कीर्तिपुर नगर समितिका अध्यक्ष बुद्धिलाल ज्यापु, ज्यापु महागुथि कीर्तिपुर नगरका अध्यक्ष रामभोला महर्जन, मानन्धर समुदायका प्रतिनिधि धर्मरत्न मानन्धर, किपू स्यस्यः समजाका प्रचण्डमान प्रधान, नापित समाजका नविन नापित, ग्वाः समाजका प्रेम कृष्ण गोपाली, माली समाजका पूर्ण मालकार, नकःमि समाजका महेश चन्द्र नकःमि, कपाली समाजका न्हुच्छे दर्शनधारी, नेवाः देय् दबू स्वनिगः विशेष प्रदेश समितिका निर्वतमान अध्यक्ष एवं पत्रकार श्रीकृष्ण महर्जनका साथै ७९ जना विभिन्न ब्यक्तित्वहरुले हस्ताक्षर गरेका थिए ।
ण
