काठमाडौं । नेकपा एकीकृत समाजवादीले हालै ६ हजारभन्दा बढी कार्यकर्ता, समर्थक र वैचारिक रूपमा निकट व्यक्तिहरूलाई एक विशेष मेल पठाएको छ । यो मेल पार्टीको आगामी रणनीति, संगठन सुदृढीकरण र कम्युनिस्ट आन्दोलनको पुनर्संरचनासम्बन्धी सन्देश बोकेको छ । यस पहलले पार्टीको सांगठनिक पुनर्जागरण र कम्युनिस्ट आन्दोलनको एकता प्रयासमा नयाँ ऊर्जा थप्ने अपेक्षा गरिएको छ ।
एसका महासचिव घनश्याम भुसालले सुशासन र रोजगारीमा केन्द्रित रहेर सुझाव माग्दै ६ हजारलाई इमेल पठाएका हुन् । पछिल्लो समय वामपन्थी दलहरु नै सर्वसाधारण, श्रमजीवीका मुद्दाबाट विमुख भइरहेका बेला एसको यो कदमले भने प्रशंसा पाएको छ ।
मेलमा पार्टीले हालै सम्पन्न महाधिवेशनबाट पारित कार्ययोजनाको सार प्रस्तुत गरिएको छ । यसमा ‘पार्टी गाउँका जनतासँग’ भन्ने अभियानमार्फत संगठनलाई जनस्तरसम्म विस्तार गर्ने, वैचारिक बहसलाई सशक्त बनाउने, र समान राजनीतिक दृष्टिकोण भएका समूहहरूसँग कार्यगत एकता गर्ने योजना उल्लेख गरिएको छ । पार्टीले जनताको बहुदलीय जनवाद (जबज) लाई मार्गदर्शक सिद्धान्तको रूपमा स्वीकार गर्दै, २१औँ शताब्दीको समाजवादी कार्यक्रमलाई परिमार्जन गर्ने प्रस्ताव गरेको छ ।
‘सुशासन र रोजगारी, समाजवादको तयारी’ भन्ने नाराका साथ सार्वजनिक राजनीतिक प्रस्तावमा एसले विगत ७५ वर्षको राजनीतिक यात्रा, आर्थिक निर्भरता, कुशासन र बेरोजगारीका कारण नेपाली जनताको जीवनमा परेको असरलाई समेटिएको छ । यो दस्तावेजले वर्तमान राजनीतिक, सामाजिक र आर्थिक अवस्थाको आलोचना गर्दै वैकल्पिक विकास मोडलको खाका प्रस्तुत गर्छ ।
प्रस्ताव अनुसार, नेपालले इतिहासमा राजनीतिक परिवर्तन त अनुभव ग¥यो, तर ती परिवर्तनहरू जनताको जीवनस्तरमा गुणात्मक सुधार ल्याउन असफल रहे । राज्य व्यवस्थाको अक्षमता, दलाल पुँजीवादको हाबी र नवउदारवादी नीतिहरूले नेपालको आर्थिक आत्मनिर्भरतामा बाधा पु¥याएको उल्लेख छ । कृषिमा आत्मनिर्भरताको अभाव, औद्योगीकरणको सुस्त गति, शिक्षाको असमानता, स्वास्थ्य सेवामा निजीकरणको प्रभाव, र भ्रष्टाचारले नेपाली समाजमा असन्तोष बढाएको भनिएको छ ।
प्रस्तावले दसवटा प्रमुख क्षेत्रलाई केन्द्रमा राखेर सुधार र विकासका एजेन्डा अघि सारेको छ । कृषिमा आत्मनिर्भरता कायम गर्न बीउ, मल, सिँचाइ, अनुदान, बजारको ग्यारेन्टी र सहकारी प्रणालीमार्फत संरचना विकास । उद्योगमा श्रम र स्रोतको सदुपयोग गर्दै, राज्यद्वारा संरक्षित औद्योगीकरण तथा गैरआवासीय नेपालीको पूँजी उपयोग । पर्यटनमा भौगोलिक र सांस्कृतिक विविधताको उपयोग गर्दै, १० लाख रोजगार सिर्जना गर्ने लक्ष्य । पूर्वाधारमा यातायात, ऊर्जा, सञ्चार र खानेपानीमा राज्यको लगानीद्वारा दीर्घकालीन रोजगारी र विकास । शिक्षामा सर्वसुलभ, गुणस्तरीय र प्राविधिक शिक्षाको सुनिश्चितता, डिजिटल प्रविधिको समावेशीकरण । स्वास्थ्यमा सार्वजनिकीकरण, आधारभूत सेवा विस्तार, बीमा र स्थानीय तहमा आपतकालीन सेवा । सुशासनमा सम्पत्ति छानबिन आयोग, पारदर्शिता, जवाफदेहिता र कानूनी राज्य । विदेश नीतिमा असंलग्नता, समानता र स्वाभिमानमा आधारित सक्रिय कूटनीति । संविधान कार्यान्वयनमा समीक्षा गरी आवश्यक संशोधन । राष्ट्रिय सम्मेलनअन्तर्गत रोजगारी र सुशासनलाई मूल एजेन्डा बनाएर सर्वपक्षीय संवाद ।
पार्टीले ‘राष्ट्रिय संवाद आन्दोलन’ सुरु गरेको र यो आन्दोलन चुनावी गणितभन्दा पर गई समाजवाद उन्मुख आर्थिक पुनर्संरचनाको अभियान भएको बताएको छ । सबै प्रगतिशील, न्यायप्रेमी नेपालीलाई सशक्त भागीदारी र सुझावका लागि आमन्त्रित गरिएको छ ।
पार्टीले हालैको स्थायी कमिटी बैठकमा अन्य कम्युनिष्ट पार्टीहरूसँग तत्काल एकता नगर्ने निर्णय गरेको छ । कार्यदिशा र सिद्धान्तमा एकरुपता नभएसम्म एकता सम्भव नहुने निष्कर्ष निकालिएको छ । यसका साथै, पार्टीले आगामी निर्वाचनमा देशभरि उम्मेदवार खडा गर्ने र संगठन सुदृढीकरण गर्ने निर्णय गरेको छ ।
एकीकृत समाजवादीले पठाएको यो विशेष मेल पार्टीको सांगठनिक पुनर्जागरण र कम्युनिस्ट आन्दोलनको एकता प्रयासमा महत्वपूर्ण कदम हो । यसले कार्यकर्ताहरूलाई सक्रिय बनाउने, वैचारिक बहसलाई सशक्त बनाउने, र समान विचारधारा भएका समूहहरूसँग सहकार्य गर्ने दिशामा पार्टीलाई अग्रसर गराउने अपेक्षा गरिएको छ । यदि यी योजनाहरू प्रभावकारी रूपमा कार्यान्वयन भएमा, नेपाली कम्युनिस्ट आन्दोलनमा नयाँ ऊर्जा थपिने सम्भावना प्रबल देखिन्छ ।
