काठमाडौँ / नेपाल सुपर लिग (एनएसएल) मा शीर्ष चारको दौडबाट स्पोर्टिङ इलाम औपचारिक रुपमा बाहिरिएको छ। शनिबार भएको दिनको दोस्रो खेलमा इलाम एफसी चितवनसँग गोलरहित बराबरी खेल्दै अङ्क बाँड्न पुगेसँगै उसको शीर्ष चारको दौडको औपचारिक अन्त्य भएको हो।
त्यस्तै, इलामसँग एक अङ्क लिएको चितवनको पनि शीर्ष चारको गणतिय सम्भावना मात्र बाँकी छ। उसलाई पनि शीर्ष चारमा पुग्ने सम्भावना कायम राख्न तीन अङ्क अत्यावश्यक रहेको अवस्थामा इलामसँग अङ्क बाँड्न पुग्दा उसको सम्भावनासमेत कमजोर भएको हो।
एक खेल खेल्न बाँकी रहेको चितवनले अन्तिम खेलमा जित हासिल गरे पनि ८ अङ्क हुन्छ। जुन तीन खेल खेल्न बाँकी रहको काठमाडौँको बराबरी हो।
त्यसैले चितवन गणितीय रुपमा शीर्ष चारमा बाँकी रहँदा अन्तिम खेल खेल्न बाँकी इलाम भने एक खेल अगावै औपचारिक रुपमा बाहिरियो। इलामको ७ खेलबाट ४ अङ्क मात्र छ। अन्तिम खेल जिते पनि उसको ७ अङ्क मात्र हुन्छ। जुन अङ्क इलामलाई शीर्ष चार पुग्न पर्याप्त हुँदैन।
शनिबारको खेलमा दुबै टिमले गोलका केही सुन्दर मौका चुकाए। दुबैतर्फका गोलरक्षकले उत्कृष्ट प्रदर्शन गरेको खेलमा सिमित मौकाबीच गोलका प्रयास भए पनि दुबै टिम सफल भएनन्। जारी प्रतियोगितामा पहिलो पटक सहभागिता जनाएको स्पोर्टिङ इलाम बराबरीपछि अङ्क तालिकाको पुछारमा नै रह्यो। चितवन भने ७ खेलबाट ६ अङ्क बनाएर सातौं स्थानमा कायम छ
