काठमाडौं । प्रभु बैंक लिमिटेडले चालू आर्थिक वर्ष २०८३/८४ को पहिलो त्रैमास (असार–असोज)को अपरिष्कृत वित्तीय विवरण सार्वजनिक गरेकाे छ ।
बैंकले समीक्षा अवधिमा ६० करोड ३७ लाख रुपैयाँ खुद नाफा कमाएको छ, जुन गत आर्थिक वर्षको सोही अवधिको तुलनामा ८.१० प्रतिशतले बढी हो। गत आवको सोही अवधिमा बैंकको खुद नाफा ५५ करोड ८४ लाख रुपैयाँ रहेको थियो।
नाफामा आएको वृद्धिसँगै बैंकको प्रतिशेयर आम्दानीमा पनि सुधार आएको छ। गत आवको पहिलो त्रैमासमा ९.४९ रुपैयाँ रहेको प्रतिशेयर आम्दानी बढेर चालू आवको सोही अवधिमा १०.२६ रुपैयाँ पुगेको छ । त्यसैगरी, बैंकको प्रतिशेयर नेटवर्थ १४३.६४ रुपैयाँ कायम भएको छ। समीक्षा अवधिमा बैंकको इम्पेयरमेन्ट चार्ज (सम्भावित नोक्सानी व्यवस्था) ४१.३५ प्रतिशतले घटेर ५८ करोड ८६ लाख रुपैयाँमा झरेको छ।
गत वर्षको सोही अवधिमा यस्तो खर्च १ अर्ब ०० करोड ३७ लाख रुपैयाँ रहेको थियो। इम्पेयरमेन्ट खर्चमा आएको कटौतिले बैंककाे खुद नाफा बढाउन सहयाेग पुगेकाे छ ।
असोज मसान्तसम्ममा प्रभु बैंकको कुल निक्षेप सङ्कलन ३ खर्ब ५० अर्ब २ करोड पुगेको छ। यस्तै, बैंकको कुल कर्जा प्रवाह २ खर्ब ११ अर्ब १३ करोड रहेको छ। बैंकिङ क्षेत्रमा कायम रहेको उच्च तरलता र ब्याजदर घट्दो क्रममा रहेका कारण बैंकको खुद ब्याज आम्दानी भने गत वर्षको २ अर्ब ८९ करोडबाट घटेर २ अर्ब ३३ करोड ४७ लाखमा सीमित भएको छ।
समीक्षा अवधिमा बैंकको आधार दर घटेर ४.९५ प्रतिशतमा झरेको छ भने स्प्रेड दर ३.१९ प्रतिशत रहेको छ ।
। नाफा र नेटवर्थमा सुधार देखिए पनि बैंकका सामु खराब कर्जा व्यवस्थापनको चुनौती कायमै छ। बैंकको खराब कर्जा अनुपात बढेर १४.८० प्रतिशत पुगेको छ, जुन गत वर्षको सोही अवधिमा ५.७८ प्रतिशत थियो।
