काठमाडौं । The Elites Co-ed School द्वारा सञ्चालित प्रारम्भिक बाल विकास तथा प्राथमिक तह ४ दिने शिक्षक अभिमुखीकरण कार्यक्रम प्रशिक्षिका दीपा मानन्धरज्यूको नेतृत्वमा प्रशिक्षक प्रकाश कपाली र गान्जु खड्काको सक्रिय सहकार्यमा सफलतापूर्वक सम्पन्न भएको छ।
यस कार्यक्रममा बालविकास आधारभूत विद्यालय, सानो संसार, चक्र मेमोरियल पाठशाला, मौलिक पाठशाला, काठमाडौं मन्टेश्वरी स्कुल, नेपाल राष्ट्रिय आधारभूत विद्यालय The elites co-ed school को शिक्षक /शिक्षिकाहरूसँगै अन्य स्कुलका शिक्षक शिक्षिकाहरूको पनि व्यक्तिगत सहभागिता रहेको थियो। कार्यक्रममा प्रारम्भिक बाल विकास र प्राथमिक तहका शिक्षकहरूलाई बालबालिकाको शैक्षिक गुणस्तर उकास्न शिक्षकको भूमिका के हुन्छ? शिक्षकले पढाइसँगै अतिरिक्त क्रियाकलापहरूलाई पनि कसरी अगाडि बढाउने भन्ने विषयमा व्यवहारिक अभ्यास गराइएको थियो भने ध्यानसँग शिक्षाको महत्व, शिक्षकको आचार संहिता, बाल अधिकारको विषयमा समेत जानकारी गराएको थियो। प्रशिक्षिका दीपा मानन्धरज्यूले बाल विकास र प्राथमिक तहका शिक्षकहरूलाई शैक्षिक गुणस्तरसँगै अतिरिक्त क्रियाकलापमा कसरी सहभागी गराउने भन्ने विषयमा सैद्धान्तिक र व्यवहारिक ज्ञानबारे प्रष्ट पार्नुभएको थियो भने Sound Healer गान्जु खड्काज्यूले बालबालिकाको बौद्धिक विकासका लागि ध्यानको महत्त्वबारे प्रकाश पार्नुभएको थियो।
यसैगरी प्रकाश कपालीज्यूले शिक्षक आचार संहिता, बाल अधिकारको विषयमा जानकारी दिनुभएको थियो। यसैगरी कार्यक्रमका प्रमुख विशिष्ट अतिथि श्री उमा लामाज्यूले कार्यक्रमको विषयमा शिक्षक शिक्षिकाहरूलाई विद्यार्थीको शैक्षिक गुणस्तर कसरी सुधार गर्ने र उनीहरूको मनोविज्ञान अनुरूप कसरी व्यवहार गर्ने भन्ने विषयमा महत्वपूर्ण महत्वपूर्ण ज्ञान प्रदान गर्नुभएको थियो। कार्यक्रमको समापन समारोहलाई सम्बोधन गर्दै The Elites Co-ed School को प्रबन्ध निर्देशक रिजेश ब्रह्म कपालीज्यूले चार दिने शिक्षक अभिमुखीकरण कार्यक्रमले शिक्षकको अध्यापन क्षमता र सिकाई अभिवृद्धिमा विकास गर्ने विश्वास व्यक्त गर्नुभयो। यसैगरी कार्यक्रमलाई समापन गर्दै सोही स्कुलका अध्यक्ष सम्झना कर्मचार्य कपालीज्यूले कार्यक्रममा उपस्थित सम्पूर्ण विद्यालयका शिक्षकहरूलाई धन्यवाद व्यक्त गर्दै चार दिने शिक्षक अभिमुखीकरण कार्यक्रम समापन भएको घोषणा गर्नुभयो। प्रारम्भिक बाल विकास र प्राथमिक तहका विभिन्न स्कुलबाट ४ दिने शिक्षक अभिमुखीकरण कार्यक्रममा आउनुभएका शिक्षकहरूले अभिमुखीकरण प्रेरणादायक र उत्साहपूर्ण रहेको बताउँदै आफूले सिकेका कुराहरूलाई व्यवहारमा पनि उतार्ने प्रतिबद्धता व्यक्त गर्नुभएको थियो। प्रकाश कपाली
