काठमाडौं । संसदीय समितिले पनि काठमाडौं उपत्यकाभित्रका सुकुम्वासी बस्तीको अवलोकन गर्ने भएको छ । सोमबार सिंहदरबारमा बसेको प्रतिनिधिसभाअन्तर्गतको कानुन, न्याय तथा संसदीय समितिको बैठकले सरकारले हालै हटाएको सुकम्वासी बस्तीका नागरिकहरूको पीडाको सुनुवाइ गर्न एक हप्ताभित्र काठमाडौं उपत्यकाभित्रका सो ठाउँमा अनुगमनमा जाने निर्णय गरेको हो । काठमाडौं उपत्यकाभित्रका सुकुम्वासी बस्तीको अवस्थाबारे अध्ययन गर्न यही हप्ताभित्र अनुगमनमा जाने निर्णय गरिएको समिति सभापति समीक्षा बास्कोटाले जानकारी दिइन् । “सुकुम्वासी बस्तीको विषयमा हामी अवस्था के छ भनेर अध्ययन तथा अनुगमन गर्न सकिन्छ जस्तो लाग्छ । त्यो काम यही हप्ताभित्र काठमाडौं उपत्यकाभित्रको सुकुम्वासी बस्तीको अध्ययन तथा अनुगमन गर्न हामी जानसक्छौँ,” उनले भनिन्, “बाहिर जाने कुराचाहिँ बजेटको कुरा पनि छ । त्यो अहिले सम्भव छैन ।” न्युज एजेन्सी नेपाल
