काठमाडाैं । नेपाली टोलीका प्रभावशाली लेग–स्पिनर सन्दीप लामिछाने आईसीसी क्रिकेट विश्वकप लिग–२ प्रतियोगितामा महत्वपूर्ण उपलब्धि हासिल गरेका छन् ।
सन्दीप लिग–२ प्रतियोगितामा एक सय विकेट लिने विश्वकै पहिलो बलर बनेका छन् । यसअघि पनि लिग–२ प्रतियोगितामा सर्वाधिक विकेट लिने बलरको सूचीमा उनी पहिलो स्थानमै थिए । उनले शुक्रबार कीर्तिपुरस्थित अन्तर्राष्ट्रिय क्रिकेट मैदानमा जारी संयुक्त अरब इमिरेट्स (यूएई)विरुद्धको खेलमा यस्तो उपलब्धि हासिल गरेका हुन् । २५ वर्षीय सन्दीपले यूएईका ओपनर ब्याट्सम्यान आर्यान्श शर्मालाई आफ्नो १००औँ सिकार बनाए ।
उनले आर्यान्शलाई ३३ रनको व्यक्तिगत स्कोरमा ललित राजवंशीद्वारा क्याच गराए । घरेलु मैदानमा जारी लिग–२ शृंखलामा यसअघि सन्दीपले ओमानविरुद्ध दुई र यूएईविरुद्ध पनि दुई विकेट लिएका थिए । उनले लिग–२ प्रतियोगिताको पहिलो संस्करणमा ३१ खेलको ३० पालीमा ७२ विकेट लिएका थिए । जारी दोस्रो संस्करणमा पनि १९ खेलको १७ पालीमा २८ विकेट लिइसकेका छन् । लिग–२ प्रतियोगितामा अमेरिकाका सौरभ नेत्रवाल्करले ९३ विकेट लिएका छन् ।
उनले पहिलो संस्करणमा ५८ र जारी संस्करणमा ३५ विकेट लिएका हुन् । सन्दीपले सन् २०१८ को अगस्त १ तारिखमा नेदरल्यान्ड्सविरुद्ध खेल्दै एकदिवसीय अन्तर्राष्ट्रिय क्रिकेटमा ‘डेब्यू’ गरेका थिए । त्यसयता सन्दीपले ६९ एकदिवसीय अन्तर्राष्ट्रियको ६७ पालीमा कुल एक सय ४० विकेट लिइसकेका छन् । यो ढाँचाको क्रिकेटमा उनको उत्कृष्ट प्रदर्शन भने केवल ११ रन खर्चिएर ६ विकेट हो ।
