काठमाडाैं ।भक्तपुर जिल्लामा बर्ड फ्लु (H9 भेरियन्ट) पुष्टि भएको छ।
भक्तपुर नगरपालिकाकाे वडा नम्बर ८ अन्तर्गत महेश्वरी पीठ क्षेत्रमा मृत अवस्थामा भेटिएका कागहरूमा साे भाइरस फेला खबर प्राप्त भएकाे छ ।
स्थानीयले कागहरू मर्न थालेको जानकारी गराएपछि नमुना परीक्षणका लागि काठमाडौंको टेकुस्थित प्रयोगशालामा पठाइएको थियो।
भक्तपुर नगरपालिकाका सूचना अधिकारी दामोदर सुवालका अनुसार शुक्रबार प्राप्त परीक्षण रिपोर्टमा बर्ड फ्लुको H9 भेरियन्ट पुष्टि भएको हो।
पशुपन्छी शाखाकी प्रमुख पार्वती योन्जनले उक्त भेरियन्ट मानिसमा नसर्ने तर पन्छीहरूबीच भने तीव्र रूपमा फैलन सक्ने बताएकी छन्। यसैबीच, वडा नम्बर १ को सिद्धपोखरी क्षेत्रमा पनि मृत काग भेटिएको जानकारी दिइएको छ।
नगरपालिकाले कुखुरा तथा अन्य पन्छी फार्महरूमा विशेष सतर्कता अपनाउन किसान र व्यवसायीलाई आग्रह गरेको छ। नगर प्रमुख सुनिल प्रजापतिका अनुसार संक्रमित पन्छीसँगको सम्पर्क तथा दाना–पानीमार्फत रोग फैलन सक्ने जोखिम भएकाले सावधानी अपनाउनुपर्ने आवश्यकता रहेको छ। नगरपालिकाले सार्वजनिक सूचना जारी गर्दै सबैलाई सचेत रहन अनुरोध गरेको छ।
