हुम्ला । डेढ महिनापछिको हिमपातले हुम्लाका किसानहरु खुसी भएका छन् । हिमपातले खडेरीले सुकेको जेठासी बाली र कातिके बाली लगाउन सहज हुने भएपछि किसान खुसी भएका हुन् ।
स्याउ र्फामका लागि डेढ सय बोट स्याउका बिरुवा लगाएका किसान दल भण्डारीले हिमपात किसानका लागि सुन जस्तै भएको बताउनुुभयो । उहाँले लामो समय खडेरी परेको कारण लगाएका बिरुवा सुक्न थालेको समयमा हिमपात र वर्षा भएपछि अब बिरुवा हुर्कान सहज भएको बताउनुुभयो ।
स्याउ ओखरका बिरुवा मात्र नभएर खडेरीले सुक्न थालेको जेठासी बालीलाई पनि बचाएको उहाँको भनाइ छ ।
अर्का किसान टक्क शाहीले कातिके बाली लगाउन कठिन भइरहेको बेला परेको हिमपातले बीउँ छर्न, खनजोत गर्न सहज भएको बताउनुुभयो । किसानहरु खडेरी परेको कारण कात्तिके बाली लगाउन नसकिने चिन्तामा थिए ।
प्रमुख जिल्ला अधिकारी श्रीनाथ पौडेलले हिमपातसँगै चिसोसमेत बढेको बताउनुुभयो । लामो समयको खडेरीपछि हिमपात हुँदा स्थानीय र बालबालिका हिउँमा रमाएका छन् ।
हिउँ पर्न सुुरु भएपछि तापक्रम माइनस सात डिग्री सेल्सियसमा झरेको छ ।
सदरमुुकाम सिमकोटभन्दा माथिल्लो क्षेत्रमा झने बाक्लो हिउँ परेको छ । यो हिउँ विशेष गरि सिमकोट गाउँपालिकाको छोबाखोर पञ्चमुखी, लब्लीडाँडा, रलिङगुम्बा, चाङ्ला हिमाल र नाँम्खा गाउँपालिकाको लिमी, हिल्सा, नारालेक, यारी, मुुचुु, चाला, न्यालुु लेकमा बढी हिमपात भएको छ ।
यसवर्षको यो तेस्रो हिमपात हो । पहिलो हिमपात गत माघ दोस्रो र दोस्रो हिमपात माघ तेस्रो हप्तामा भएको थियो । रासस
