काठमाडौं । जिल्ला प्रशासन कार्यालय काठमाडौंले सुरु गरेको पब्लिक अनाउन्समेन्ट सिस्टम ‘पास’ प्रभावकारी हुँदै गएको छ । सेवा प्रवाह सहज बनाउन जिल्ला प्रशासनले ७ महिनाअघि सार्वजनिक घोषणा प्रणाली (पब्लिक अनाउन्समेन्ट सिस्टम) लागु गरिएको थियो ।
सो प्रणालीमा सूचना प्रविधिको उच्चतम प्रयोग र टोकन प्रणालीबाट सर्वसाधारणलाई सेवा दिइन्छ । पास प्रणाली सुरु भएपछि काठमाडौँ जिल्ला प्रशासनबाट सेवाग्राहीले करिब २० मिनेटमा नै नागरिकता पाउन थालेका छन् । काठमाडौँका प्रमुख जिल्ला अधिकारी ईश्वर राज पौडेल भन्छन्, ‘कागजात पुरा भएका सेवाग्राहीले टोकन प्रणालीबाट २० मिनेटमा नागरिकता पाउँछन् ।’
जिल्ला प्रशासनले पब्लिक अनाउन्समेन्ट सिस्टम लागु गरेपछि सर्वसाधारणलाई सहयोग गर्न हेल्प डेस्कमा डेडिकेटेड कर्मचारी खटाउँदै आएको छ । हेल्प डेस्कबाट टोकन लिएका कर्मचारीलाई सेवा प्रदान गर्न प्रहरी कर्मचारी पनि खटिन्छन् ।
जेनजी प्रदर्शनपछि सुशासनको माग बढेपछि त्यसलाई सम्बोधन गर्न पब्लिक अनाउन्समेन्ट सिस्टमबाट सेवा दिन लागिएको प्रजिअ पौडेलले बताए । उनका अनुसार काठमाडौँ जिल्ला प्रशासनमा राष्ट्रिय परिचयपत्रको बायोमेट्रिक दिने काम १० मिनेटमा पुरा हुन्छ । पासपोर्ट बनाउने प्रक्रिया पनि करिब १० मिनेटमा पुरा हुने प्रजिअ पौडेलले जनाए ।
सेवा प्रवाहलाई नेपालकै मोडल कार्यालयको रूपमा विकास गर्ने गरी २०८२ पुसबाट काठमाडौँमा सो सेवा सुरु गरिएको थियो । आधुनिक शैलीको सेवा प्रणालीलाई प्रभावकारी बनाउन प्रजिअको कार्यकक्षबाट सिसिटिभीमाबाट मनिटर गर्न सकिने र त्यहीँबाटै निर्देशन दिन सकिने प्रविधिको विकाश गरिएको छ । प्रजिअ पौडेलका अनुसार सेवाग्राहीले बिना झन्झट निश्चित समयमा सेवा लिन थालेका छन् ।
हेल्पडेस्कमा कर्मचारीले सेवाग्राहीको कागजात स्क्रिनिङ्ग गरेपछि कर्मचारीले डिजिटल प्रणालीबाट टोकन दिनेछन् । टोकन पाएका सेवाग्राहीले बढीमा २० मिनेटमा सेवा पाउनेछन्। ‘पास’ प्रणाली प्रभावकारी बन्दै गएको छ ।
२०७९ मा जिल्ला प्रशासन कार्यालय काठमाडौँले ‘टाइम कार्ड’ लागु गरेको थियो । तत्कालीन उप–प्रधान एवं गृहमन्त्री रवि लामिछानेको निर्देशनमा त्यसबेला १० प्रकारका सेवामा टाइमकार्ड लागु गरिएको थियो । टाइम कार्ड लागु गर्दा काठमाडौँका प्रजिअ घनश्याम उपाध्याय थिए । उपाध्याय अहिले अर्थ मन्त्रालयका सचिव छन् ।
