जाजरकोट । अविरल वर्षाका कारण जाजरकोटको भेरी नगरपालिका- २ स्थित रिसाङ क्षेत्रमा आएको लेदोसहितको पहिरोमा परी मृत्यु हुनेको संख्या तीन पुगेको छ। पहिरोमा परी अझै दुई जना बेपत्ता छन्।
शनिबार साँझ आएको पहिरोमा परी ५४ वर्षीया उमा सिंह खत्री र ८३ वर्षीया रति खत्रीको शव खोजीका क्रममा फेला परेको थियो।
यसैगरी पहिरोमा घाइते भएका ५२ वर्षीय केदार कार्कीको उपचारका क्रममा मेडिकल कलेज कोहलपुरमा मृत्यु भएको जिल्ला अस्पताल जाजरकोटले जनाएको छ।
पहिरोमा परी घाइते भएका ६२ वर्षीय रामबहादुर शाही, ४५ वर्षीय सिद्धिबहादुर कामी, ५८ वर्षीया कमला कार्की, २३ वर्षीया अनिता कार्की, १० वर्षीय युनिस शाही, ४५ वर्षीया सुन्तली चदरा र ६१ वर्षीया भद्रकला कार्कीको उपचार भइरहेको छ। घाइतेमध्ये रामबहादुर शाही र भद्रकला कार्कीको अवस्था गम्भीर रहेकाले थप उपचारका लागि नेपालगन्ज र सुर्खेत पठाइएको छ।
पहिरोमा परी भेरी नगरपालिका–२ चिसापानीका ७० वर्षीय भीमबहादुर कार्की र गैरीगाउँका १४ वर्षीय हरिस बि.क. अझै बेपत्ता छन्। पहिरोपछि घरबाट निस्किएका हरिस सम्पर्कविहीन भएका हुन्।
बेपत्ताको खोजी तथा उद्धारका लागि नेपाली सेना, नेपाल प्रहरी र सशस्त्र प्रहरी बलको संयुक्त टोली परिचालन गरिएको छ। सशस्त्र प्रहरी निरीक्षक कमल कार्कीको कमाण्डमा विपद् व्यवस्थापन तालिम प्राप्त सुरक्षाकर्मीले खोजीकार्य गरिरहेका छन्।
पहिरोका कारण स्थानीय आठ वटा घरमा समेत ठूलो क्षति पुगेको छ। बेपत्ताको खोजी तथा उद्धारकार्य जारी रहेको प्रहरीले जनाएको छ।
