काठमाडौं । त्रिभुवन विश्वविद्यालय अन्तर्गत पुल्चोक इन्जिनियरिङ कलेजका विद्यार्थी पहिलो पटक अन्तर्राष्ट्रिय स्तरको कार रेसिङ कार निर्माण प्रतियोगितामा सहभागी हुने भएका छन् ।
भारतमा आगामी जनवरीमा आयोजना हुन लागेको ‘फरमुला भारत’ नामको प्रतिस्पर्धामा पुल्चोक इन्जिनियरिङ कलेजका विद्यार्थीहरू रेसिङ कार निर्माण गरेर प्रदर्शन गर्नेगरी सहभागी हुन लागेका हुन् । जुन प्रतिस्पर्धामा विभिन्न विषयगत ८९ वटा टिम सहभागी हुँदैछ ।
नेपाली विद्यार्थीको तर्फबाट अन्तर्राष्ट्रिय प्रतिस्पर्धामा पहिलो सहभागिता हुन लागेकोले कलेजले पनि विशेष महत्व दिएर तयारीलाई सहयोग पुर्याइरहेको छ । प्रतिस्पर्धामा सहभागी हुनको लागि कलेजले विद्यार्थीबीचमा टिम गोर्खाली नामको समूह निर्माण गरेको छ ।
सो समूहमा मेन्टरसिप समूहमा कलेजका प्राडा प्रमोद श्रेष्ठ, प्राडा महेशचन्द्र लुइटेल, प्राडा सूर्यप्रसाद अधिकारी, सहायक प्राध्यापक डा सुदीप भट्टराई र अमित पण्डित रहेका छन् । त्यसैगरी, फ्याकेल्टी सल्लाहकार रमेश चौधरी, डिजाइन मेन्टर रवि मिश्र, आदित्य न्यौपाने र प्राविधिक सहयोगीमा देव श्रेष्ठ र सन्दीप चौधरी रहेका छन् ।
कार निर्माणदेखि प्रतियोगितासम्मको मुख्य भूमिकामा विद्यार्थीको तर्फबाट विशेश्वर आचार्य, सम्बिद कोइराला, उज्जवल भट्ट, गौरवमान जोशी, अनिदल पाण्डे, गौरव राई, काविज्ञ पोखरेल, अंकित लिम्बु, कुशल शर्मा, सौरभकुमार शाह, प्रज्वल ढकाल, कोसिस पोखरेल, एलिस यादव, अंशु सुवेदी, इभा बस्नेत र विजय थपलिया रहेका छन् ।
टिमका सदस्य विशेश्वर आचार्यका अनुसार प्रतियोगिताको लागि भारत फर्मुलाले निश्चित कामहरूको लागि निश्चित समय तालिका नै तोकेको छ ।
जसमध्ये यही २५ अगस्टसम्म कलेजको तर्फबाट डिजाइन बनाएर पठाइसक्नुपर्ने हुन्छ । जुन काम अहिलेसम्म टिम गोर्खालीले सम्पन्न गरिसकेको कोइरालाले बताए ।
नोभेम्बर १५ सम्म कार निर्माण गर्ने र डिसेम्बर ७ सम्म टेस्ट गरिसक्नुपर्ने हुन्छ । त्यसपछि आगामी जनवरी २७ मा व्यावसायिक प्रस्तुतीसहित टिम प्रतिस्पर्धामा सहभागी हुनुपर्छ ।
प्रतिस्पर्धामा कार ड्राइभको लागि अटोमोटिभ क्लबका सदस्यहरूले तयारी गरिरहेको पनि उनले बताए ।
आचार्यका अनुसार प्रतिस्पर्धामा सहभागी हुनेगरी डिजाइन गरिएको रेसिङ कार निर्माणका लागि १७ लाख ३१ हजार रुपैयाँ खर्च हुने अनुमान गरिएको छ । जुन कार ४ सिसी मोटर क्षमताको र प्रतिघण्टा ८० किलोमिटर भन्दा धेरै दौडिन सक्ने प्रकृतिको हुनेछ ।
तर, स्रोतको व्यवस्था भने भइसकेको छैन । जसको लागि कलेजका प्राध्यापक र विद्यार्थीहरूले विभिन्न विकल्पमा संयुक्त ढंगले प्रयास गरिरहेका छन् ।
‘अहिले हामीले विभिन्न तहमा रहेर ६ ढंगले हाम्रो प्रतिस्पर्धामा सहयोग गर्न सकिने हिसाबले स्पोन्सरको प्याकेज तयार गरेका छौँ, केही पक्षसँग छलफल पनि भएको छ, तर, सुनिश्चित भइसकेको छैन’, प्राडा प्रमोद श्रेष्ठले भने ।
कलेजले प्रतियोगिताको लागि १५ लाख रुपैयाँको टाइटल स्पोन्सर, ७ लाख ५० हजार रुपैयाँ बराबरको प्लाटिनम स्पोन्सर, ५ लाख रुपैयाँ बराबरको गोल्ड स्पोन्सर, २ लाख रुपैयाँ बराबरको सिल्भर स्पोन्सर, ७५ हजार रुपैयाँ बराबरको ब्रोन्ज स्पोन्स र अन्यलाई कन्ट्रिब्युटरको रूपमा राखेको छ ।
नेपाली इन्जिनियरिङ विद्यार्थीको तर्फबाट अन्तर्राष्ट्रिय प्रतिस्पर्धामा सहभागी हुन लागेको यो पहिलो पहल भएकाले सबै क्षेत्रको तर्फबाट सहयोग हुने विश्वास पनि गोर्खाली समूहले लिएको छ ।
