काठमाडौं । राष्ट्रिय स्वतन्त्र पार्टी (रास्वपा) का सांसद जनकसिंह धामीले काठमाडौं उपत्यकामा आठ सय ग्रामलाई एक किलो भनेर सामान बेचबिखन भइरहेको पाइएको जनाएका छन् । प्रतिनिधिसभाको मंगलबारको बैठकमा उनले काठमाडौंलगायत धेरै सहरहरूमा १५० भन्दा बढी विभिन्न किसिमका सामानहरूको तुलनात्मक र गुणस्तरको चाँसो राखेर बुझ्ने क्रममा यस्तो पाइएको जनाएका हुन् ।
‘सामानको प्रचार गरिएजस्तो गुणस्तर नभएको पाएँ । यो कुरा अनलाइन व्यापारमा बढी देखियो । एक हजार ग्रामको एक किलो हुने भए पनि काठमाडौं उपत्यकाभित्र कहीँ कतै आठ सय ग्रामको एक किलो हुने गरी सामान बिक्री वितरण भएको पाएँ,’ धामीले भने । उनले कृत्रिम अभाव सिर्जना गरी बढी पैसा असुल्ने काम भइरहेको पनि संसद्मा गुनासो गरे । ‘स्तरीय खाजा घरको नाममा चर्को मूल्य अशुलेको पाएँ । समतामुलक सामाजिक संस्कार र चलन कतै भेटिएन,’ सांसद धामीले भने ।
यसको प्रत्यक्ष प्रभाव र असर समाजका विभिन्न तह र तप्काको दैनिक जनजीवनमा परिरहेको अस्तव्यस्त बजार प्रणालीलाई सुधार्न उपभोक्ताहरूको हकहितलाई सुरक्षित गर्न हामी कहाँ चुकिरहेका छौं भनेर पनि उनले प्रश्न गरे । ‘देखिने र महसुस हुने गरी सम्बन्धित निकायलाई समस्याहरू तत्काल समाधान तिर लैजान म सभामुखज्यू मार्फत हार्दिक अनुरोध गर्दछु,’ सांसद धामीले भने ।
