कपिलवस्तु । शिवराज नगरपालिकाअन्तर्गत रहेको आधारभूत स्वास्थ्य सेवा अस्पताल, चन्दौटाको रकम हिनामिना गरेको आरोपमा प्रहरीले ५ जनालाई पक्राउ गरेको छ ।
अस्पतालको ३८ लाख १९ हजार ७७० रुपैयाँ सरकारी रकम संगठित रूपमा ठगी र आपराधिक विश्वासघात गरी हिनामिना गरेको अभियोगमा उनीहरूलाई पक्राउ गरिएको हो ।
पक्राउ पर्नेहरूमा शिवराज नगरपालिकाको स्वास्थ्य शाखा प्रमुख चूडामणि भट्टराई, अस्पतालका मेडिकल सुपरिटेन्डेन्ट डा. अमित पाण्डेय, अस्पतालकी फार्मेसी सहायक रुक्सना खातुनका साथै नेपाल बैंक लिमिटेड चन्दौटा शाखाका क्यासियर कमल प्रसाद भण्डारी र नेपाल बैंक लिमिटेडका कार्यालय सहयोगी विक्रम केसी पक्राउ परेका छन् ।
पक्राउ परेका पाँचै जनालाई कपिलवस्तु जिल्ला अदालतबाट ठगी तथा आपराधिक विश्वासघात कसुर मुद्दामा ७ दिनको म्याद थप गरी हिरासतमा राखेर विस्तृत अनुसन्धान भइरहेको सूचना अधिकारी प्रहरी नायब उपरीक्षक रिपेन्द्र कुमार सिंहले जानकारी दिए ।
प्रहरीका अनुसार सरकारी अस्पतालको रकममा नक्कली भौचर खडा गरी संगठित रूपमा भ्रष्टाचार र ठगी गरिएको यो गम्भीर प्रकृतिको घटना हो ।
