काठमाडाैं । प्रधानमन्त्री वालेन्द्र शाह (बालेन) संसदमा जवाफ दिन नआएको भन्दै विपक्षीले प्रतिनिधिसभाको बैठकमा विरोध गरेका छन् ।
सरकारको नीति कार्यक्रममा छलफल गर्ने प्रस्ताव पेस गर्न प्रधानमन्त्री शाह नपाएपछि विपक्षीले विरोध गरेका हुन् ।
नेपाली कांग्रेस, नेकपा एमाले, नेकपा, राप्रपा, श्रम संस्कृति पार्टीका सांसदहरूले प्रधानमन्त्री नआएको भन्दै बैठकमा विरोध गरेका हुन् । विपक्षी राप्रपाका संसदीय दलका नेता ज्ञानेन्द्र शाहीले जनताको सरकार हो भने जनताप्रति उत्तरदायी हुनुपर्ने उनले जनाए ।
‘अघिल्लोपटक हामी १४ सांसद हुँदा, रास्वपाका तपाईंहरू २१ जना हुनुहुन्थ्यो । अघिल्लोपटक प्रधानमन्त्रीले नबोल्दा हामीले बैठक बंक गरेका थियौँ । जनताको सरकार हो जनताको उत्तरदायित्व संसदबाट खोज्ने हो । रत्नपार्कबाट होइन,’ उनले भने, ‘यो रास्वपाका १८१ सांसदको अस्तित्वको कुरा हो । यहाँभन्दा व्यस्त प्रम कहाँ हुनुहुन्छ ? नीति कार्यक्रम सुन्ने, जवाफ दिने यही हो । मन्त्रिपरिषद्मा कालो चश्मा लगाएर बस्नुभएको छ । यहाँ आउन किन नसक्ने ?’
प्रधानमन्त्री बिरामी भएको, मुलुक छोडेर गएको हो भने मात्रै अर्को प्रतिनिधिले बोल्ने भन्दै उनले सांसदको अस्तित्वमा प्रश्न नउठाइदिन आग्रह गरे । ‘अस्ति पनि प्रधानमन्त्रीले राष्टपतिलाई पढ्न दिनुभएको हो । यो भन्दा ठूलो काम कुनै हुन सक्दैन । आफैँले ल्याएको नीति कार्यक्रम आफैँ सुन्न नसक्ने यो के तरिका हो ?’ प्रश्न गर्दै उनले भने ।
