ललितपुर । स्प्यारो एसएमएसले एसईई-२०८३ को नतिजा प्रकाशनका लागि यस वर्ष पनि आफ्नो एसएमएस सेवा निरन्तर सञ्चालन गर्ने भएको छ ।
कम्पनीले विगत १६ वर्षदेखि राष्ट्रिय परीक्षा बोर्डसँग सहकार्य गर्दै विद्यार्थीलाई मोबाइलमार्फत सहज रूपमा नतिजा उपलब्ध गराउँदै आएको जनाएको छ । राष्ट्रिय परीक्षा बोर्डले एसईई-२०८३ को नतिजा छिट्टै सार्वजनिक गर्ने तयारी गरिरहेको अवस्थामा, स्प्यारो एसएमएसले ३५००१ सर्ट कोडमार्फत विद्यार्थीले तुरुन्तै नतिजा प्राप्त गर्न सक्ने व्यवस्था मिलाएको जनाएको छ । कम्पनीका अनुसार वेबसाइटमा अत्यधिक ट्राफिक हुँदा हुने समस्या कम गर्न उच्च क्षमताको प्राविधिक पूर्वाधार तयार गरिएको छ । स्प्यारो एसएमएसका प्रमुख कार्यकारी अधिकृत मनोज थापाले विद्यार्थीलाई तनावपूर्ण समयमा सहज सेवा प्रदान गर्नु नै कम्पनीको मुख्य उद्देश्य रहेको बताए । उनले दुर्गम क्षेत्रका विद्यार्थीले समेत सामान्य मोबाइलबाट इन्टरनेट बिनै नतिजा हेर्न सक्ने सुविधा उपलब्ध गराइएको उल्लेख गरे । एसईईको नतिजा हेर्न विद्यार्थीले मोबाइलको मेसेज बक्समा गई SEE लेखेर आफ्नो सिम्बोल नम्बर टाइप गरी ३५००१ मा पठाउनु पर्नेछ । त्यसपछि GPA सहितको नतिजा मोबाइलमै प्राप्त हुने कम्पनीले जनाएको छ । सन् २०१० देखि सञ्चालनमा आएको स्प्यारो एसएमएस नेपालका बैंक, सरकारी निकाय तथा शैक्षिक संस्थासहित ८ हजारभन्दा बढी संस्थालाई सेवा प्रदान गर्दै आएको अग्रणी म्यासेजिङ प्लेटफर्म हो ।
