काठमाडौं । ललितपुरस्थित एभरेष्ट इन्जिनियरिङ कलेज (EEC) को आयोजनामा ‘Civil Engineering Innovations & Sustainable Development (CEISD–2026)’ विषयक अन्तर्राष्ट्रिय सम्मेलन आज नेपाल एडमिनिस्ट्रेटिभ स्टाफ कलेज (NASC), जावलाखेलमा औपचारिक रूपमा सुरु भएको छ। सिभिल इन्जिनियरिङ क्षेत्रमा नवप्रवर्तन, दिगो विकास तथा अन्तर्राष्ट्रिय सहकार्य प्रवर्द्धन गर्ने उद्देश्यका साथ आयोजना गरिएको उक्त सम्मेलनले राष्ट्रिय तथा अन्तर्राष्ट्रिय स्तरका विज्ञ, अनुसन्धानकर्ता, प्राध्यापक तथा विद्यार्थीहरूलाई एकै मञ्चमा ल्याएको छ।
सम्मेलनको उद्घाटन सत्र बिहान ९:०० बजेदेखि सुरु भएको हो। कार्यक्रममा प्रमुख अतिथि पोखरा विश्वविद्यालयका उपकुलपति प्रा. डा. बेदराज केसीको विशेष उपस्थिति रहेको छ। उहाँले आफ्नो मन्तव्यमा दिगो पूर्वाधार विकास, अनुसन्धान–आधारित शिक्षा तथा नवप्रवर्तनलाई सशक्त बनाउनु आजको आवश्यकता भएको उल्लेख गर्नुभयो। साथै, यस्ता अन्तर्राष्ट्रिय सम्मेलनहरूले ज्ञान आदानप्रदान, अनुसन्धान सहकार्य तथा प्राविधिक क्षमताको विकासमा महत्वपूर्ण भूमिका खेल्ने धारणा व्यक्त गर्नुभयो।
उद्घाटन सत्रसँगै सञ्चालन भइरहेको प्राविधिक सत्रहरूमा विभिन्न देशका विशेषज्ञ वक्ताहरू (Keynote Speakers) ले सिभिल इन्जिनियरिङका समसामयिक चुनौती, प्रविधिगत रूपान्तरण तथा दिगो विकाससँग सम्बन्धित विषयहरूमा गहन प्रस्तुतीकरण गरिरहेका सह-प्राचार्य एसोसिएट प्रोफेसर इन्जिनियर राजन लामा ले जानकारी गराएअनुसार यस सम्मेलनमा अष्ट्रेलिया, जर्मनी, नेपाल, भारत, संयुक्त अरब इमिरेट्स (UAE) तथा जापान गरी ६ देशबाट ४० भन्दा बढी अनुसन्धान पत्रहरू प्रस्तुत गरिनेछन्। उहाँका अनुसार यसले सम्मेलनलाई अन्तर्राष्ट्रिय स्तरको ज्ञान आदानप्रदान तथा अनुसन्धान सहकार्यको प्रभावकारी मञ्चका रूपमा स्थापित गरेको छ।
दिउँसो १:०० बजेदेखि ४:३० बजेसम्म सञ्चालन हुने थिम–आधारित समानान्तर सत्रहरूमा चार प्रमुख विषयहरूमा केन्द्रित प्रस्तुतीकरण तथा छलफल गरिनेछ।
थिमहरू यस प्रकार छन्:
स्मार्ट, दिगो तथा लचिलो भौतिक पूर्वाधार (Smart, Sustainable & Resilient Built Environment)
भू–प्राविधिक तथा भूमिगत यातायात प्रणालीमा नवप्रवर्तन (Innovations in Geotechnical & Underground Transport System)
जलविद्युत् तथा जलवायु–मैत्री पूर्वाधार (Resilient Hydropower & Climate Smart Infrastructure)
एकीकृत पानी, सरसफाइ तथा वातावरणीय प्रणाली (Integrated Water, Sanitation & Environmental System)
यी सत्रहरू अन्तरक्रियात्मक ढंगले सञ्चालन हुनेछन्, जहाँ सहभागीहरूले आफ्ना अनुसन्धान प्रस्तुत गर्दै विशेषज्ञहरूसँग प्रत्यक्ष संवाद तथा सहकार्य विस्तार गर्ने अवसर प्राप्त गर्नेछन्।
सम्मेलनमा उद्योग र शैक्षिक क्षेत्रबीचको सहकार्यलाई थप सुदृढ बनाउन विभिन्न कम्पनीहरूको उल्लेखनीय साथ रहेको छ। टाइटल/गोल्ड स्पोन्सरका रूपमा समनन्तर ग्रुप रहेको छ भने सिल्भर र ब्रान्ज स्पोन्सरका रूपमा विभिन्न निर्माण, कन्सल्टिङ, व्यवस्थापन तथा इन्जिनियरिङ क्षेत्रमा आवद्ध संस्थाहरूले सहयोग गरेका छन्। यस्ता सहकार्यहरूले प्राविधिक शिक्षा र उद्योगबीचको सम्बन्धलाई अझ मजबुत बनाउने अपेक्षा गरिएको छ।
कार्यक्रममा राष्ट्रिय तथा अन्तर्राष्ट्रिय स्तरका अनुसन्धानकर्ता, प्राध्यापक, इन्जिनियर तथा विद्यार्थीहरूको सक्रिय सहभागिता रहेको छ। सम्मेलनले ज्ञान आदानप्रदान, अनुसन्धान विस्तार तथा व्यावसायिक नेटवर्क सुदृढीकरणमा महत्वपूर्ण योगदान पुर्याउने विश्वास गरिएको छ।
सम्मेलनको समापन सत्र आज साँझ ५:०० बजेदेखि ६:०० बजेसम्म सञ्चालन हुनेछ, जहाँ सहभागीहरूलाई प्रमाणपत्र वितरण गरिनेछ र कार्यक्रम औपचारिक रूपमा सम्पन्न गरिनेछ।
मुख्य विवरणहरू:
कार्यक्रम: International Conference on Civil Engineering Innovations & Sustainable Development (CEISD–2026)
मिति: २६ अप्रिल, २०२६ (वैशाख १३, २०८३)
स्थान: नेपाल एडमिनिस्ट्रेटिभ स्टाफ कलेज (NASC), जावलाखेल, ललितपुर
आयोजक: सिभिल इन्जिनियरिङ विभाग, एभरेष्ट इन्जिनियरिङ कलेज
प्रमुख अतिथि: प्रा. डा. बेदराज केसी, उपकुलपति, पोखरा विश्वविद्यालय
विशेष जानकारी: ४०+ अनुसन्धान पत्र, ६ देशको सहभागिता
समय: बिहान ९:०० – साँझ ६:०० बजे
