काठमाडौं । राष्ट्रिय प्रजातन्त्र पार्टीको इतर पक्षले एकसाताभित्र केन्द्रीय महाधिवेशनको मिति घोषणा गर्न माग गरेको छ ।
राप्रपा नेता धवल शमशेर राणाको नेतृत्वमा आइतबार बसेको बैठकले सन्तुलित र विश्वसनीय वातावरणमा केन्द्रीय महाधिवेशन आयोजनाको माग गरेको हो । उक्त महाधिवेशनमा निष्पक्ष व्यक्तिको संयोजनमा हुनुपर्ने इतर पक्षको माग छ ।
यस्तै राप्रपाको आदर्श, विधान र अनुशासन विपरीत भएका काम कारबाहीको न्यायसंगत छानबिनका लागि समिति गठन गर्न पनि उक्त पक्षले माग गरेको छ ।
२०७८ को एकता महाधिवेशनबाट नयाँ ऊर्जासहित अघि बढेको राप्रपा संसदीय चुनावमा खुम्चिएसँगै नेतृत्व परिवर्तनको माग हुन थालेको हो ।
पार्टी अध्यक्ष राजेन्द्र लिङदेनलाई सम्बोधन गरेर लेखिएको माग पत्रमा भनिएको छ,“अध्यक्ष राजेन्द्र लिङदेनले मलाई खेल्न दिनुहोस्, राप्रपालाई देशको पहिलो पार्टी बनाउँछु भन्नुभएको थियो, पार्टीको पक्षमा अकल्पनीय नतिजा प्राप्त हुने बताउनुभएको थियो । नतिजा त अकल्पनीय नै प्राप्त भयो तर, नकारात्मक रूपमा ।”
निर्वाचन परिणामको डेढ महिनासम्म पनि चुनावी असफलताबारे लेखाजोखा नभएको भन्दै उक्त समूहले आपत्ति जनाएको छ ।
यस्तै, संस्थागत निर्णयविना उपसभामुखमा उमेदवारी दिएको भन्दै इतर पक्षले परिस्थितअनुसार चल्न नेतृत्व असफल भएको जिकिर गरेको छ ।
“उपसभामुख पदमा उमेदवारी दिएबाट राप्रपामाथि निष्ठा र सैद्धान्तिक आधारमा प्रश्न मात्र उठेन, प्रजातान्त्रिक अनुशासन र जिम्मेवारीबाट पार्टी र नेतृत्व पूर्ण चुकेको निष्कर्ष प्रवाह भयो,” पत्रमा भनिएको छ ।
महाधिवेशनबाट नयाँ नेतृत्वमा अघि बढ्नुको विकल्प राप्रपामा नभएको उक्त समूहको निष्कर्ष छ ।
