काठमाडौं । झापाको बिर्तामोड बसपार्क क्षेत्रमा रहेको ५१ बिगाहा क्षेत्रका स्थानीय बासिन्दाले आफ्नो ठाउँमा उम्मेदवारलाई प्रवेश गर्न नदिने अभियान चलाएका छन् । मालपोत कार्यालयले यहाँको जग्गा रोक्का गरिदिएको विरोधमा उनीहरूले यस्तो अभियान सुरु गरेका हुन् ।
यहाँका स्थानीयले आगामी निर्वाचनमा कुनै पनि राजनीतिक दलका उम्मेदवारलाई आफ्नो क्षेत्रमा प्रवेश गर्न नदिने र राजनीतिक गतिविधि गर्न नदिने घोषणा गरेका छन्। उनीहरूले आफ्नो क्षेत्रमा चुनाबी गतिविधि निषेध गरिएको जानकारी दिन बसपार्कको चारै दिशामा ब्यानर टाँगेका छन् ।
वास्तवमा पहिले यहाँ गिरीबन्धु टी इस्टेटअन्तर्गत चिया बगान थियो । पछि चिया बगान अन्यत्र स्थानान्तर गरेर उक्त ५१ बिघा क्षेत्रफललाई व्यावसायिक प्लटिङ गरिएको थियो । २०६२ सालदेखि घडेरीका रूपमा बिक्री थालिएको उक्त क्षेत्रफल अहिले पूर्ण रूपमा व्यावसायिक तथा आवासीय क्षेत्रको रूपमा परिणत भएको छ ।
२ वर्षअघि सर्वोच्च अदालतले गिरिबन्धु टी स्टेटको जग्गा सट्टापट्टा गर्न दिने सरकारको निर्णय रोक लगाएको थियो । सर्वोच्चले रोक लगाएको निर्णय केपी ओली सरकारले २०७८ सालको बैशाखमा गरेको थियो । तर, ५१ बिगाह क्षेत्रजो जग्गा पनि धेरै वर्ष पहिले गिरिबन्धुकै भएको आधारमा टेकेर मालपोत कार्यालयले सर्वोच्चको आदेशअनुसार भन्दै यहाँको सबै जग्गा रोक्का गरेको छ ।
मालपोतले जग्गा रोक्का गरिदिँदा यहाँका करिब १० हजार नागरिक प्रत्यक्ष प्रभावित भएका छन्। बिर्तामोड बसपार्क क्षेत्रको ५१ बिघा जग्गामा पछिल्लो १५ वर्षमा ६ सयभन्दा बढी पक्की घर, शैक्षिक संस्था र व्यापारिक संरचनाहरू निर्माण भएका छन्। अन्तर्राष्ट्रिय सहयोगमा बनेका पूर्वाधारहरू समेत रहेको यस क्षेत्रको जग्गा रोक्का हुँदा स्थानीयले बैंकबाट ऋण लिन, व्यवसाय सञ्चालन गर्न र किनबेच गर्न पाएका छैनन्।
