काठमाडौं । भारतको पश्चिम बंगालमा घातक ‘निपाह भाइरस’को संक्रमण पुष्टि भएसँगै नेपाल सरकारले सीमा नाकाहरूमा उच्च सतर्कता (हाइ अलर्ट) अपनाएको छ। स्वास्थ्य तथा जनसंख्या मन्त्रालयले हवाई र स्थल दुवै मार्गबाट नेपाल भित्रिने यात्रुहरूको कडा निगरानी सुरु गरेको हो।
भारतमा संक्रमण बढ्दो क्रममा रहेको र खुला सीमाका कारण नेपालमा यसको जोखिम ‘उच्च’ रहेको भन्दै स्वास्थ्य विज्ञहरूले सर्वसाधारणलाई व्यक्तिगत सरसफाइ र खानपानमा विशेष ध्यान दिन आग्रह गरेका छन्।
मन्त्रालयका प्रवक्ता डा. प्रकाश बुढाथोकीका अनुसार सीमा क्षेत्रमा रहेका हेल्थ डेस्कहरूलाई सक्रिय बनाइएको छ। शंकास्पद लक्षण देखिएका यात्रुहरूलाई तत्कालै पहिचान गरी आवश्यक प्रक्रिया अघि बढाउन निर्देशन दिइएको छ।
संक्रमणको जोखिमलाई मध्यनजर गर्दै मन्त्रालयले सीमा नाकामा निगरानी बढाउनेदेखि निपाहसँग मिल्दाजुल्दा लक्षण भएका बिरामीको विवरण संकलन गर्नेसम्मका काम अगाडि बढाउन भनिसकेको डा बुढाथोकीले जानकारि दिए। यसका साथै प्रभावित क्षेत्रबाट आउने व्यक्तिहरूलाई निश्चित समयका लागि सम्पर्कबाट टाढा रहन र क्वारेन्टाइनमा बस्न सुझाइएको पनि उनले बताए।
विश्व स्वास्थ्य संगठनका अनुसार निपाह भाइरस कोरोनाभन्दा पनि बढी घातक मानिन्छ। यसको मृत्युदर ४० देखि ७० प्रतिशत सम्म छ। यो भाइरस मुख्यतया: संक्रमित चमेरो र सुंगुरबाट मानिसमा सर्छ। संक्रमित पशुले जुठो हालेका फलफूल वा तिनीहरूको मासु खाँदा सर्छ। संक्रमित व्यक्तिसँगको नजिकको सम्पर्कबाट पनि यो फैलिन सक्छ।
संक्रमण भएको ३ देखि १४ दिनभित्र ज्वरो आउने, टाउको दुख्ने, खोकी लाग्ने र श्वासप्रश्वासमा समस्या हुने जस्ता लक्षण देखिन्छन्। जटिल अवस्थामा यसले मस्तिष्क सुन्निने र बिरामी २४ देखि ४८ घण्टाभित्रै कोमामा पुग्न सक्ने जोखिम रहन्छ।
भारतमा यसअघि पनि विभिन्न समयमा यो भाइरसको संक्रमण फैलिएको थियो।
