काठमाडौं । नेकपा माओवादी केन्द्रले संघीय निजामति विधेयकको ‘कुलिङ पिरयड’प्रकरणमा प्रधानमन्त्री केपी शर्मा ओलीमाथि छानबिन गर्न माग गरेको छ।
बुधबार बसेको प्रतिनिधि सभा बैठकमा माओवादी सांसद लेखनाथ दाहालले राष्ट्रिय सभामा एमालेका सांसदले कुलिङ पिरियड हटाउन संशोधन हालेको भन्दै संकाको दायरमा प्रधानमन्त्री पनि रहेको जनाए ।
‘कुलिङ पिरियडमा बेइमानी कसले गर्यो भनेर छानबिनका लागि संसदीय छानबिन समिति बनाइएको छ। यसै सन्दर्भमा सम्माननीय प्रधानमन्त्री आवद्ध दल नेकपा एमालेबाट राष्ट्रिय सभामा सहभागी माननीयज्यूहरूले कुलिङ पिरियडकाविरुद्धमा संशोधन दर्ता गराउनु भएको छ।
यसले प्रधानमन्त्रीमाथि पनि संका उब्जन्छ। उहाँलाई पनि छानबिनको दायरामा ल्याउन म संसदीय छानबिन समितिलाई आग्रह गर्दछु’, दाहालले भने। एमालेका सांसदले कुलिङ पिरियड हटाउन संशोधन हालेपछि कांग्रेससमेत एमालेसँग चिढिएको छ।
कांग्रेसका नेता डा. शेखर कोइरालाले नेकपा एमालेले राष्ट्रियसभामा संघीय निजामती विधेयकमा हालेको संशोधनप्रति आपत्ति जनाइसकेका छन्।
