काठमाडौं । लक्ष्मी सनराइज बैंकले आर्थिक वर्ष २०७९/८० सम्मको सवारीसाधन कर्जा तथा आवासीय कर्जाअन्तर्गत निष्कासित कार्बन उत्सर्जन प्रतिवेदन सार्वजनिक गरेको छ ।
बैंक कार्बन एकाउन्टिङ फाइनान्सियल पार्टनरसिप (पीसीएएफ)सँग २०२१ देखि आबद्ध छ ।
पीसीएएफ वित्तीय संस्थाहरूको विश्वयापी साझेदारी समूह हो । यसले वित्तीय संस्थाहरूको कर्जा र लगानीका क्षेत्रहरूमार्फत उत्सर्जन हुने हरित ग्यास गृहको मूल्यांकन र सोका विवरणहरू संकलन र सार्वजनिक गर्ने काम गर्छ ।
लक्ष्मी सनराइजले प्रकाशित गरेको विवरणले बैंकको सवारीसाधन कर्जा र आवासीय कर्जामार्फत गत आर्थिक वर्षसम्म कुल १५ हजार ९ सय ६५ दशमलव ११ टन कार्बनडाइअक्साइड इक्विभ्यालेन्ट उत्सर्जन गरेको देखाएको छ, जसमध्ये सवारीसाधन कर्जामार्फत ३ हजार ६ सय ४४ दशमलव ५१ र आवासीय कर्जामार्फत १२ हजार ३ सय २० दशमलव ६० टन कार्बन उत्सर्जन भएको छ ।
बैंकले आफ्नो कार्बन फुटप्रिन्टको पहिचानसँगै उत्सर्जन गरेको टीसीओटु ई’को असरलाई न्यूनीकरण गर्न पहल अगाडि बढाइसकेको जनाएको छ ।
विभिन्न हरित परियोजनामा लगानी बढाउनुका साथै आफ्ना डिजिटल प्लेटफर्मको पहुँचलाई अझ सुगम र बलियो बनाउने, पूर्णरूपमा डिजिटल बचतखाताहरूको सञ्चालन गर्ने र आफ्ना ग्राहकहरूलाई दिगो अभ्यासहरू गर्न प्रेरित गर्ने लगायतका कार्यहरू गर्दै आएको बैंकले उल्लेख गरेको छ ।
