काडठमाडौं । अखिल नेपाल फुटबल संघ(एन्फा) एन्फाको साधारण सभामा पूर्वअध्यक्ष गणेश थापालाई प्रवेश रोक लगाइएपछि त्यहाँको अवस्था तनावपूर्ण बनेको छ।
सर्वोच्च अदालतको आदेश विपरित थापालाई प्रवेशमा रोक लगाइएपछि उनी धर्नामा बसेका छन्।
थापा साधारण सभामा भाग लिने अदालतको कागजसहित शुक्रबार बिहानै धुलिखेल पुगेका थिए । तर उनीसँग साधारण सभाको लागि एन्फाले जारी गरेको पास नभएको भन्दै सुरक्षाकर्मीले गेटमै रोकेका थिए। उनीसँगै उनका छोरा गौरव थापालाई समेत प्रवेशमा रोक लगाइएको थियो।
उनले सदस्यसचिवलाई समेत ग्यापन पत्र बुझाएका छन्। स्थिति तनावपूर्ण बनेपछि थापाले विरोध जनाएका हुन्। यद्यपि थापालाई उद्घाटन सत्रमा प्रवेश दिइएको छैन्। उनी सभाहल बाहिर नै रोकिएका छन्।
थापाले गेटमा रोक्ने सम्भावना देखिएपछि प्रमुख अतिथिका रूपमा रहेका राष्ट्रिय खेलकुद परिषद् (राखेप) का सदस्य सचिव टंकलाल घिसिङ सभाहलको पछाडी गेटबाट कार्यक्रममा प्रवेश गरेका थिए।
फिफाको १० वर्षको प्रतिबन्ध फुकुवा भएपछि थापा पहिलो पटक एन्फाको औपचारिक कार्यक्रममा सहभागी हुँन लागेका थिए।
उनी सहिद स्मारक ‘बी’ डिभिजन लिग क्लब आरसी ३२ को सदस्यको रुपमा साधारणसभामा सहभागी हुन पुगेका थिए। तर उनी प्रतिनिधि भएदेखिनै एन्फाको वर्तमान नेतृत्वले रोक्ने प्रयास गरीरहेको छ।
थापालाई साथै दिँदै एन्फाका वरिष्ठ उपाध्यक्ष वीरबहादुर खड्का, उपाध्यक्ष विराटजंग शाही तथा सदस्य रविन्द्र चन्द र रुपेश अधिकारी पनि उद्घाटन समारोहमा सहभागी भएका छैनन्।
