काठमाडौं । भक्तपुरको गट्ठाघरमा घटेको घटना संसदमा प्रवेश गरेको छ।
आज बसेको प्रतिनिधिसभा बैठकमा सांसद सुशीला थिङले ट्राफिक प्रहरीले लुकेर चेकिङ गर्दा उक्त दुर्घटना घटेको भन्दै यसरी लुकेर चेकिङ गर्न बन्द गर्नुपर्ने माग गरिन्।
उनले भनिन्, ‘साउन ३१ गते भक्तपुरको गठ्ठाघरमा ट्राफिकले स्पिड चेक गर्ने क्रममा एउटा स्कुटरलाई रोकी चेक गर्दा एक्कासी मालवाहक ट्रकले ठक्कर दिँदा स्कुटरचालक उत्तम कोइरालाको घटनास्थलमै ज्यान गयो, मृतकप्रति हार्दिक श्रद्धाञ्जलि अर्पण गर्दै र घटना घट्नुको कारण ट्राफिक प्रहरीले लुकिछिपी स्पिड चेक गर्दा घटना घटेको सुन्न आएको हुँदा अबदेखि ट्राफिक प्रहरीले त्यसरी लुकिछिपी चेक नगर्न र याे कार्यलाई राेक्न सरकारको ध्यानाकर्षण गर्दछु।’
साउन ३१ गते बा ४९ प ८९४४ नम्बरको स्कुटरलाई ना ६ ख २१७३ नम्बरको ट्रकले ठक्कर दिँँदा ओखलढुंगाको चिसंखुगढी गाउँपालिका–४ घर भई काठमाडौँको कपन बस्ने ६५ वर्षीय उत्तम कोइरालाको घटनास्थलमै मृत्यु भएको थियो।
उक्त घटना ट्राफिक प्रहरीले लुकेर चेकिङ गर्दा घटेको भन्दै सर्वसाधारणहरुले उक्त कार्यशैलीप्रति प्रश्न उठाएका छन्।
