काठमाडौं । अभिनेता तथा ज्योतिष हरिहर अधिकारी र अभिनेत्री नीता ढुंगानाको अभिनय रहेको चलचित्र ‘ह्रश्व दीर्घ’ असोज ३ मा प्रदर्शनमा आउने भएको छ ।
निर्माण टिमले फिल्मलाई एक हप्ता अगाडि सार्दै प्रदर्शन मिति परिवर्तन गरेको हो ।
‘ह्रश्व दीर्घ’ असोज ३ मा ‘चलचित्र कुन मितिमा ल्याउने भन्ने विषयमा हामी जिम्मेवार हुने कुरा रहन्छ, असोज ३ प्रदर्शनको लागि उपयुक्त दिन ठानेर उक्त मिति रोजिएको हो,’निर्मातासमेत रहेकी अभिनेत्री ढुंगानाले भनिन् ।
चलचित्रको अहिले पोस्ट प्रोडक्सनको काम भइरहेको पनि उनले जनाइन् । अभिनेत्री विपना थापा पनि लामो समयपछि यही फिल्ममार्फत फेरि देखिँदैछिन् । चन्द्र पन्तको निर्देशन रहेको यस चलचित्रमा हरिहर र नीतासँगै, चर्चित दक्षिण भारतीय कलाकार ब्रह्मानन्दम, बलिउड कलाकार प्रदीप रावतसँगै गरिमा शर्मा, प्रशान्त ताम्राकार, सरोज खनाललगायतको अभिनय छ । चलचित्रलाई भारतको रामोजी स्टुडियोदेखि मुम्बई, चितवन र काठमाडौंमा खिचिएको हो ।
अभिनेता हरिरहरद्वारा लिखित कथामा आधारित यो फिल्ममा बलिउड छायाँकार कवीरलालको छायांकन, मित्र डी गुरुङको सम्पादन, रामजी लामिछाने र बलिउड कोरियोग्राफर शुष्मा सुमनको कोरियोग्राफी छ । यो फिल्म नीता फिल्म्सको ब्यानरमा निर्माण भएको हो ।
