वीरगञ्ज – मधेस आन्दोलनको क्रममा सशस्त्र प्रहरीका असई थमन विकको हत्या गरेको आरोप लागेका नेकपा एमालेका सांसद लक्ष्मी महतो कोइरीले अदालतबाट सफाइ पाएका छन्।
अदालतले विकको हत्याको आरोपमा मुद्दा दायर गरिएका २८ जनामध्ये सांसद कोइरीसहित पवन कापरले पनि सफाइ पाएका छन्। जिल्ला अदालत महोतरीका न्यायाधीश उद्धवप्रसाद भट्टराईको इजलासले उनीहरुलाई बिहीबार सफाइ दिएको हो।
यस्तै, लोकतान्त्रिक समाजवादी पार्टी (लोसपा)का मधेस प्रदेश संसदीय दलका नेता अभिराम शर्मालाई जन्मकैदको फैसला भएको अदालतकी श्रेस्तेदार नुतन झाले जानकारी दिइन्। उनका अनुसार शर्मासहित ७ जनालाई जन्मकैदको फैसला भएको छ। बाँकी १६ जना भने अझै फरार रहेका छन्।
जन्मकैदको सजाय पाउनेमा शर्मासहित सञ्जयकुमार साह, प्रदिप साह माझी, मोहन ठाकुर, धर्मेन्द्र राय, रामशंकर मिश्र भन्ने शंकर शाही र सुरेश पाण्डे छन्।
०७२ भदौ २५ गते विकलाई एम्बुलेन्सबाट थुतेर हत्या गरिएको थियो। सोही वर्ष फागुन २७ गते जिल्ला अदालत महोतरीमा कोइरीसहित २८ जनाविरुद्ध कर्तव्य ज्यान मुद्दा दर्ता भएको थियो।
हेटौँडाबाट राष्ट्रसंघीय मिसनका लागि आवश्यक परीक्षा दिएर ड्युटीको लागि महोत्तरी आएका विकमाथि महोत्तरीमा आन्दोलनकारीले आक्रमण गरेका थिए। घाइते विकको जलेश्वर अस्पतालमा उपचार हुन नसकेपछि थप उपचारको लागि जनकपुर ल्याउँदै गर्दा महोत्तरीको साविक अनैठा गाविसमा आन्दोलनकारीले एम्बुलेन्सबाट निकालेर कुटपिट गरेर हत्या गरेका थिए।
०७४ साल मंसिर ४ को निर्वाचनमा महोत्तरी क्षेत्र नम्बर १ बाट नेकपा एमालेबाट सांसदमा चुनाव जितेका कोइरी ०७२ सालको मधेस आन्दोलनका बेलामा मधेसवादी दलमा आबद्ध थिए।
