नारायण शर्मा
देश अहिले विष्फोटक र विद्रोहात्मक अवस्थाबाट गुज्रिरहेकाे छ । दलाल र गद्दार तथा प्रतिगामी र यथास्थितिवादी शक्तिहरुको होहल्ला, हालीमुहाली र हुकुमहैकमले नेपाल र नेपाली जनता अत्यन्त आक्रान्त, आहत र आजित छन् ।
उनीहरु क्रान्ति, मुक्ति, प्रगति, न्याय, समानता, समृद्धि, दीगो विकास र स्थायी शान्तिका लागि अति नै आतुर छन् । देशको यो अवस्था र जनताको यो चाहनालाई प्रयोग गरेर देशी-विदेशी प्रतिक्रियावादीहरुले सचेत, सुनियोजित, संगठित र षड्यन्त्रकारी संघर्षद्वारा देशलाई प्रतिगमनतिर मात्र होइन पूर्ण औपनिवेशीकरणतिर लैजाँदै छन् । तर अग्रगामीहरु र स्वाधीनताका हिमायतीहरु भने यस्तो गम्भीर अवस्थामा केही नगरेर मूकदर्शक भएर बस्ने दुखद बिडम्बना भएको छ ।
अब हामी अग्रगमन र राष्ट्रिय स्वाधीनताका पक्षधर भनिनेहरु आपसी आग्रह, पूर्वाग्रह र प्रतिशोध परित्याग गरी तत्काल एकजुट भै यो षड्यन्त्रकारी संघर्षका बीचबाट देशको यो भयावह र विकराल स्थितिलाई परिवर्तन गर्नको लागि क्रान्ति अगाडि बढाउन सचेतता, साहस र समर्पणका साथ पहल लिन अत्यन्त जरुरी छ । यसो गर्न सके जनवादी क्रान्तिले सफलता, विजय र पूर्णता पाउने अर्थात् राष्ट्रियता, लोकतन्त्र/जनतन्त्र र जनजीविकाका आधारभूत समस्याहरु आधारभूत रुपमै हल हुने पूरै सम्भावना छ । तसर्थ यो क्रान्ति सम्पन्न गरी यस्लाई स्थापित, सुदृढ र विकसित गर्दै निरन्तर अगाडि बढाउनको लागि पहल लिन समेत ढिला भैसकेको छ । तर विडम्बना कस्ले पहल लिने ? ठुला क्रान्तिकारी भनिएका पार्टी र नेतालाई खुबै मतलब भएजस्तो छैन ।
उनीहरु ठुलो भएको, स्थापित भएको, क्रान्तिकारी र देसभक्तको परिचय बनाएकोमै मख्ख छन् । हामी चुन्नेमुन्नेलाई देश, जनता र क्रान्तिको चिन्ता, चासो र छट्पटी भएर गरेको पहल कस्ले मान्ने ? आफू पनि नगर्ने अरुले गरेको पनि नटेर्ने यो अहंकार र आत्मरति ठुला र स्थापितहरुले अविलम्ब छोड्न र पूर्ण संवेदनशील, गम्भीर र जिम्मेवार भएर एकता र संयुक्त मोर्चाद्वारा संयुक्त, सशक्त र निर्णायक आन्दोलनका लागि तत्काल देखिनेगरी प्रभावकारी र परिणाममुखी पहल लिन अत्यन्त जरुरी छ ।
अन्यथा यसै कथित क्रान्तिकारी र देसभक्तिको अहंकार, आत्मरति र अकर्मण्यताका बिचमै बिलाउने भयो नेपाली क्रान्तिकारी र देसभक्तिपूर्ण आन्दोलन ! अझ भनौं आन्दोलन मात्र होइन देस र क्रान्तिको नाम-निशान नरहने अवस्था हुन सक्ने प्रबल सम्भावना छ । के गरौं ? केही उपाय छ कि सच्चा देशभक्त, लोकतन्त्रवादी/जनवादी, प्रगतिशील, वामपन्थी, क्रान्तिकारी, समाजवादी र साम्यवादी साथी, संघसंस्था र शक्तिहरु ? छ भने के छ, त्यो गरिहालौं संयुक्त र सशक्त भएर ! कसो ?
