काठमाडौँ / सर्वोच्च अदालतले परमादेश जारी गरेको २४ घण्टाभित्रै कोशी प्रदेशमा ठूलो दलको संसदीय दलको नेताको हैसियतमा हिक्मत कार्कीले मुख्यमन्त्रीको पद तथा गोपनीयताको शपथ लिएका छन्।
बिहीबार सर्वोच्चको पूर्ण इजालाले उद्धव थापाले लिएको विश्वसाको मतलाई बदर गर्दै संविधानको धारा १६८ (३) अनुसार कार्कीलाई ४८ घण्टाभित्र मुख्यमन्त्री नियुक्त गर्न परमादेश दिएको थियो।
आदेश जारी भएको २४ घण्टामै प्रदेश प्रमुख पर्शुराम खापुङले कार्यान्वयन गरेका छन्। कार्कीले शुक्रबार साँझ प्रमुख खापुङसमक्ष पद तथा गोपनीयताको शपथ लिएका हुन्।
मुख्यमन्त्री कार्कीसँगै तीन मन्त्री र एक राज्यमन्त्रीले पनि शपथ लिएका छन्। उर्जामन्त्रीमा तिलकुमार मेन्याङ्वो, वनमन्त्रीमा पाँचकर्ण राई र भौतिक पूर्वाधारमन्त्रीमा एकराज कार्कीले शपथ लिएका हुन्। यस्तै, सिजना राई सामाजिक विकास राज्यमन्त्री नियुक्त भएकी छन्।
यसअघि धारा १६८ (२) बमोजिम नियुक्त भएका कार्कीले विश्वसाको मत नपाउँदा असार १५ गते सत्ता छाड्नु परेको थियो। ठूलो दलको हैसियतमा फेरि मुख्यमन्त्री नियुक्त भए पनि कार्कीले विश्वासको मत पुर्याउने सम्भावना अहिलेसम्मको विकसित राजनीतिक घटनाक्रमअनुसार देखिँदैन।
असार १५ मा एमालेको ४० र राप्रपाको ६ मतसहित ४६ मत पाएका कार्की एक मत नपुग्दा पदच्युत भएका थिए। यसपटक पनि राप्रपाले कार्कीलाई समर्थन जारी राख्ने निर्णय गरेको छ। तथापि, अबको ३० दिनभित्र विश्वासको मत लिँदा ४७ मत पुग्ने सुनिश्चिता छैन।
राप्रपाले कार्की नेतृत्वको सरकारलाई समर्थन जारी राख्ने जनाएको छ। विराटनगरस्थित प्रदेश प्रमुखको कार्यालयमा पत्रकारसँग संक्षिप्त कुराकानी गर्दै राप्रपा कोशी प्रदेश संसदीय दलका नेता भक्ति सिटौलाले संविधानमाथि भएका हस्तक्षेपहरुलाई सर्वोच्च अदालतले सच्चाएको बताए।
सिटौलाले भने, ‘अब एमालेको संसदीय दलको नेताको नेतृत्वमा बन्ने सरकारलाई राप्रपाले समर्थन गर्छ। सरकारमा अहिले नै हामी सहभागी हुँदैनौँ। तर हाम्रो समर्थन पूरा रहने छ।’
अहिले नै सरकारमा जाने अवस्था नभएको बताएका सिटौलाले भने, ‘विश्वासको मतसम्म सरकारलाई समर्थन गर्ने हो। विश्वासको मतपछि पनि केन्द्रीय कमिटिले निर्णय गर्छ। सरसल्लाह गर्छौँ। तर, अहिले नै सरकारमा जाने भने होइन।’
विश्वासको मतका लागि ४७ सिट आवश्यक हुनेमा सिटौलाले भने, ‘अहिले यो कुरा राजनीतिक हो। रात रहे अग्राख पलाए भने झैँ होला। त्यसका लागि गम्भीरतापूर्व लाग्न एमाले नेतृत्वलाई भनेका छौँ। तर, मध्यवाधितर्फ हामी जादैनौँ।’
