काठमाडौँ / ककपिटमा अक्सिजनको मात्रा घटेका कारण मलेसियामा मंगलबार ११ घन्टा ग्राउन्डेड भएको नेपाल वायुसेवा निगमको उडानमा संलग्न दुई जना पाइलटलाई नागरिक उड्डयन प्राधिकरणले ‘स्पष्टीकरण’ सोधेको छ ।
प्राधिकरणको फ्लाइट सेफ्टी स्ट्यार्डड विभागले मंगलबारको उडानमा रहेका निगमका दुई जना पाइलटलाई सिनामंगलमा बोलाई मौखिक र लिखित स्पष्टीकरण लिएको हो । ‘विभागका विशेषज्ञ पाइलट बिएम अमात्यले मंगलबारै निगमको अपरेशन विभागलाई मलेसियाबाट काठमाडौं फर्किने क्रममा रहेको विमानको अक्सिजनको मात्रा घट्नुको कारणबारे पत्राचार गर्नुभएको थियो,’ प्राधिकरणका एक अधिकारीले भने, ‘त्यसैअन्तर्गत बुधबार दुबै पाइलटसँग अक्सिजन अभाव के कसरी हुन गयो भनी सोधपुछ र घटनाको लिखित विवरण मागियो ।’
ती अधिकारीका अनुसार, विभागले अर्को निर्णय नहुन्जेलसम्मका लागि दुबै पाइलटलाई उडानमा नराख्न निगमलाई निर्देशन दिइएको छ । प्राधिकरणले उक्त उडानमा रहेका इन्जिनियरसँग मंगलबारै लिखित विवरण लिएको थियो । ‘दुई पाइलट र एक इन्जिनियर गरी तीनै जनाको घटनासँग सम्बन्धित बयानलाई बिहीबार विश्लेषण गरी के कारणले भएको हो, त्यसै अनुसार कारबाही प्रक्रिया थालिने छ,’ ती अधिकारीले भने । प्राधिकरणले यो घटना पाइलटहरुको ज्ञानको अभावले भएको हो वा नियतवश भएको हो भन्नेबारे एकिन पहिचान भएपछि प्राधिकरणको नियमअनुसार कारबाही गर्ने जनाएको छ ।
यसैबीच, निगमले मंगलबार राति ९:४५ बजे मलेसियाका लागि हुनुपर्ने उडान झन्डै ७ घन्टा ढिलो गरेको छ । मलेसियामा जहाज ११ घन्टा ग्राउन्डेड भएका कारण मंगलबार उसले मलेसियाको उडान बिहान साढे ४ बजेमात्रै उडाएको थियो । दिउँसो १:४५ बजे बैङलुरु उड्नुपर्ने निगमको त्यो न्यfरोबडी ७ घन्टा ढिलो राति ९ बजे काठमाडौंबाट बैङलुरुका लागि उडेको थियो । बैङलुरुबाट बेलुकी फर्कंदा काठमाडौंमा बेलकी ९:४५ बजे आइपुग्नुपर्ने जहाज बिहान ३ बजेमात्रै अवतरण भएको थियो ।
एउटामात्रै जहाज त्यसमाथि प्राविधिक समस्या दोहोरिएपछि निगमको यात्रुसेवा विभागका प्रबन्धक केशर थापाले मंगलबार त्रिभुवन अन्तर्राष्ट्रिय विमानस्थललाई पत्रमार्फत एउटै जहाजले तीनवटा सेक्टरमा उडान गर्नुपर्ने भएकाले विमानस्थल बिहान ४:३० बजेसम्म खुला राखिदिन अनुरोध गरेका थिए । निगमकै उडानका लागि राति ३ बजे बन्द हुने काठमाडौं विमानस्थल बिहान ४:३० बजेसम्म खुला गरिएको थियो । निगमले मलेसिया जाने यात्रुलाई विमानस्थल नजिकैका होटलमा राखेको थियो ।
