काठमाडाैं । विराटनगर घर भएकी २२ वर्षीया किशोरीलाई जबरजस्ती करणीको प्रयास गरेको आरोपमा उच्च अदालतका कर्मचारी पक्राउ परेका छन् ।
उच्च अदालत जनकपुरको वीरगञ्ज इजलाशका शाखा अधिकृत नारायण प्याकुरेल पक्राउ परेका छन् । विराटनगर महानगरपालिका–१ पोखरिया घर भएका ४८ वर्षीया प्याकुरेललाई मोरङ प्रहरीले पक्राउ गरेको हो । पक्राउ परेका प्याकुरेलले मदिरा सेवन गरेर विराटनगरकी २२ वर्षीया किशोरीलाई बलात्कारको प्रयास गरेको आरोप लागेको छ ।
उनले ती किशोरीलाई रातिको समयमा घरमा पुगेर १ हप्ता अगाडि बलात्कारको प्रयास गरेको महिलाले दिएको जाहेरीमा उल्लेख गरिएको छ । प्रहरीले प्याकुरेललाई बुधवार पक्राउ गरी जबरजस्ती करणी उद्योगमा ५ दिनको म्याद थप गरी अनुसन्धान शुरू गरेको छ ।
जबरजस्ती करणी उद्योगमा पक्राउ परेका प्याकुरेल विवादित व्यक्ति हुन् । यसअघि पनि उनी विवादमा पर्दै कारबाहीमा परेका थिए । २०६३ सालमा सोलु जिल्लामा प्याकुरेल नासु हुँदा कारबाहीमा परेका थिए । त्यतिबेला अदालतका कर्मचारीलाई दुव्र्यवहार गरेको आरोप लागेको थियो । त्यसपछि सर्वाेच्च अदालतले कारबाही गरेर प्याकुरेललाई सोलु जिल्ला अदालतबाट मुगु जिल्ला अदालतमा सरुवा गरेको थियो ।
त्यसपछि उच्च अदालत राजविराजमा उनको सरुवा भएको थियो । त्यहाँ पनि प्याकुरेलले उच्च अदालत राजविराजको प्रशासन शाखाका अधिकृत हरिशंकर महतोमाथि कुटपिट गरेको आरोप लागेको थियो । महतोलाई कुटपिट गरेपछि सर्वाेच्च अदालतले प्याकुरेललाई काज सरुवा गरेर वीरगञ्ज पठाएको थियो ।
