काठमाडौं । अभिनेत्री पूजा शर्मा लामो समयदेखि फिल्मविहीन छिन् । उनले नयाँ चलचित्र निर्माण गर्ने घोषणा एक वर्षअघि नै गरेकी थिइन् । गत १९ असारमा उनले आफ्नो फिल्मका लागि अभिनेता अनमोल केसीलाई नायकका रूपमा अनुबन्धित गरेकी थिइन् । तर, त्यो चलचित्र अहिलेसम्म पनि छायांकन भएको छैन ।
अभिनेता अनमोल केसीले यति बेला दुईवटा चलचित्रमा अभिनयका लागि सम्झौता गरेका छन् । उनी ती दुई चलचित्रको तयारी गर्दै छन् । सम्झौताअनुसार अनमोलले अभिनेत्री पूजा शर्माको फिल्ममा गत २०७९ भित्रै काम गर्नुपर्ने थियो । तर, उनले यो चलचित्रलाई समय दिएनन् ।
पूजाको चलचित्रलाई सुदर्शन थापाले निर्देशन गर्ने तयारी गर्दै थिए । यो चलचित्रमा काम गर्न अभिनेता अनमोलले आलटाल गरेपछि आफूलाई अनमोलले समय नदिएको अभिनेत्री पुजाले सञ्चार माध्यममा बताएकी छन् । अनमोलले पूजासँग लिएको सम्झौताअनुसारको पारिश्रमिक पनि फर्काउने बताएका छन् । सोही कारण अनमोललाई लिएर पूजाले निर्माण तथा अभिनय गर्ने भनिएको चलचित्र अन्योलमा परेको छ ।
अभिनेत्री पूजाले आफ्नो चलचित्रमा अनमोलले तत्काल काम नगर्ने देखिएपछि रेखा थापाको फिल्ममा काम गर्ने तयारी गर्दै छिन् । ज्ञानेन्द्र देउजाले निर्देशन गर्ने भनिएको नयाँ चलचित्रको असारबाट छायांकनको तयारी हुँदै छ । यो चलचित्रमा रेखा थापा र पूजा चन्द मुख्य भूमिकामा हुनेछन् ।
