काठमाडौं । सन् १७८९ मा आजकै दिन अमेरिकाले पहिलो राष्ट्रपति पाएको थियो । राष्ट्रपति जर्ज वासिङ्टनले अप्रिल ३० मा न्युयोर्कको वाल स्ट्रिटस्थित फेडेरल हलमा शपथ लिएका थिए । उनी १७९७ सम्म अमेरिकाको राष्ट्रपति थिए ।
१७३२ को फेब्रुअरी २२ मा भर्जिनियाको पप्स क्रिकमा जन्मिएका वासिङ्टनको राष्ट्रपति पदबाट हटेको दुई वर्षपछि १७९९ मा मृत्यु भएको थियो । वासिङ्टनले आफ्नो जीवनमा भने कुनै पनि औपचारिक शिक्षा लिएका थिएनन् । वासिङ्टनले १७५२ देखि करिब ६ वर्ष भर्जिनिया विद्रोहीको नेतृत्व गरेका थिए । वासिङ्टन १७७५ मा गठित कन्टिनेन्टल आर्मीको प्रमुख भएका थिए ।
उनले अमेरिकी स्वतन्त्रता युद्धको सुरुवातमा अश्वेतलाई सेनामा भर्ती नदिने कदमको प्रतिरोध गरेका थिए । अमेरिकालाई ब्रिटिस उपनिवेशबाट मुक्त भएसँगै वासिङ्टनले आफ्नो रेभुलुसनरी आर्मी भंग गरेका थिए । सेना राष्ट्रको मेरुदण्ड हुने भन्दै कतिपयले उक्त कदमको विरोध गरेका थिए । तर त्यसको जवाफमा वासिङ्टनले भनेका थिए– सेना नभई कुनै राष्ट्रको मेरुदण्ड भनेको सामूहिक शक्ति, समृद्धि तथा जनता हुने बताएका थिए ।
देशमा कुनै पनि संकट उत्पन्न हुँदा नागरिकले अन्तिम अवस्थासम्म पनि योगदान दिने अवस्थाको निर्माण गर्नुपर्ने उनको भनाइ थियो । पछि १७८४ को जुन ३ मा कंग्रेस अफ कन्फेडेरेसनले अमेरिकी सेना गठन गरेको हो ।
