जनकपुरधाम – लामो विवादपश्चात् केही महिनाअघि जानकी मन्दिरमा विवाह गरेकी निहारीका भन्ने सोनाली कुमारी सिंहको श्रीमानसँग पुनः खटपट सुरु भएको छ।
श्रीमान शिवराज श्रेष्ठसँग खटपट भएपछि जनकपुरधाम उपमहानगरपालिका ४ मा छुट्टै कोठा लिएर बस्दै आएकी निहारीका बिहिबार अचेत अवस्थामा फेला परेकी थिइन् । कोठामा अचेत अवस्थामा फेला परेपछि विष सेवन गरेको आशंकामा उनलाई अस्पताल लगिएकोमा उनले विष सेवन नगरी सामान्य कारणले बेहोस भएको खुलेको प्रहरीले जनाएकाे छ।
धनुषाका प्रहरी प्रवक्ता प्रहरी नायव उपरीक्षक वेदप्रसाद गौतमले निहारीका सामान्य कारणले विहोस भएको र उनी अस्पतालबाट साँझ नै डिस्चार्ज भइसकेको बताए।
निहारीकाले शिवराजले आफूलाई बलात्कार गरेको र त्यसबाट बच्चा जन्मेको भन्दै लामो समयसम्म मुद्दा लडेकी थिइन् । जिल्ला अदालतले बलात्कार मुद्दामा शिवराजलाई सफाई दिएपछि उच्च अदालत जनकपुरमा मुद्दा चलिरहेको समय निहारीका र शिवराजले सहमती गरेका थिए ।
अदालतमा सहमति गरेको केही समयपछि जानकी मन्दिरमा औपचारीक रुपमा विवाह गरेका दुबैजनाबीच अहिले पुनः सम्बधन्ध बिग्रेको हो । शिवराजसँग खटपट सुरु भएपछि निहारीका बच्चा लिएर जनकपुरधाममा डेरामा एक्लै बस्न थालेकी हुन् ।
