पोखरा – कास्की प्रहरीले फागुन १४ गते सार्वजनिक गरेको तथ्याङ्कमा बैंकिङ कसुरका मुद्दा २१५ दर्ता थिए। त्यतिबेला जिल्ला प्रहरी कार्यालय कास्कीमा ८२६ मुद्दा दर्ता भएको थियो।
आइतबार कास्की प्रहरीले पत्रकार सम्मेलन गरेर आफ्ना गतिविधि सार्वजनिक गर्दा ११३ बैंकिङ कसुरका मुद्दा थपिएको छ। जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक श्रवणकुमार विकले दिएको जानकारीअनुसार साउनदेखि चैत १५ गतेसम्म कास्कीमा ३२८ बैंकिङ कसुरका मुद्दा दर्ता भएको छ। १९९ पर्छ्यौट हुँदा १२९ मुद्दाको छिनोफानो लाग्न बाँकी छ।
आम सर्वसाधरणमा बैंकिङ सेवाको पहुँच जसरी बढेको छ, त्यसैगरी बैकिङ कसुर मुद्दाको ग्राफ उकालो चढेको प्रहरीको तथ्याङ्कले पुष्टि गर्छ। कास्कीमा बैंकिङ कसुरका घटना यो वर्ष मात्रै होइन बर्षेनी बढिरहेको छ।
गत आर्थिक वर्षको तुलनामा यो वर्षको साढे ८ महिनामै दोब्बरले मुद्दा बढेको हो। आर्थिक वर्ष २०७८/७९ मा १४९ मुद्दा प्रहरीमा परेको थियो। २०७७/७८ मा १०० र २०७६/७७ मा ९७ मुद्दा दर्ता भएका थिए।
आर्थिक मन्दीका कारण बैकिङ कसुरका मुद्दा बढेको हुन सक्ने प्रहरी नायब उपरीक्षक विकले बताए। बैंकिङ कसुरमा बढी चेक बाउन्सको मुद्दा पर्ने उनले सुनाए। उनका अनुसार चेकमा उल्लेख गरेका रकम अपुग हुने र खाता बन्द भइसकेका चेक काट्नेलगायतका घटना बढी प्रहरीसँग आउँछ।
‘त्यस्ता मुद्दालाई हामीले दुई तवरबाट समाधानको कोशिस गर्छौँ’, उनले भने, ‘मिलापत्र हुन सक्ने अवस्थामा मिल्नुस् भन्छौँ। त्यसबाट पनि समस्या समाधान भएन भने मुद्दा दर्ता भएर कानुनी प्रक्रियाअनुसार अगाडि बढ्छ।’
चेक बाउन्सका कतिपय मुद्दा अदालतमा पनि दर्ता हुने गरेको प्रहरी नायब उपरीक्षक विकले बताए। वर्षेनी बढेको मात्रै छैन, प्रहरीमा दर्ता भएका मुद्दाको सबैभन्दा धेरै संख्या नै बैंकिङ कसुरको छ। जिल्ला प्रहरी कार्यालय कास्कीमा १ हजार २२३ मुद्दा दर्ता भएकोमा २६.८१ प्रतिशत मुद्दा त बैंकिङ कसुरका हुन्।
सार्वजनिक हित स्वास्थ्य सुरक्षा सुविधा र नैतिकताविरुद्धको कसुरमा ३०१ मुद्दा दर्ता भएको कास्की प्रहरीले जानकारी दिएको छ। स्थानीय तहको सहकारी शाखा र न्यायिक समितिमा पनि बैंकिङ कसुरसँग मिल्दोजुल्दो उजुरी परिरहेका छन्।
