काठमाडौं । नेपाल समाजवादी पार्टीका नेता हिसिला यमीले द्वन्द्वकालीन मुद्दा अदालतबाट हेर्न नमिल्ने जनाएकी छन् । उनले त्यसो गरे शान्ति सम्झौता विपरीत हुने समेत जनाइन ।
माओवादी धारका दलले आयोजना गरेको पत्रकार सम्मेलनमा नेता यमीले बहालवाला प्रधानमन्त्रीलाई मुद्दा लगाउनु जनतालाई मुद्दा लगाए सरह भएको टिप्पणी पनि गरिन् ।
उनले भनिन्, ‘बहालवाला प्रधानमन्त्रीलाई मुद्दा लगाउनु भनेको जनतामाथि मुद्दा लगाउनु सरह हो । परिवर्तन पक्षधरमाथि मुद्दा लगाउनु हो । यो मुद्दा सबै दलको मुद्दा हो ।
यसलाई सत्य निरूपण तथा मेलमिलाप आयोग मार्फत टुंगो लगाउनुपर्छ ।’ विस्तृत शान्ति सम्झौताको मुख्य तीन कार्यभार मध्ये संविधान निर्माण र जनमुक्ति सेनाको व्यवस्थापन पुरा भएपनि संक्रमणकालीन मुद्दा व्यवस्थापन हुन नसकेको उनले बताइन् ।
