वीरगञ्ज – गाँजासहित तीन पक्राउ परेका छन्। पक्राउ पर्नेमा बारा जितपुरसिमरा उपमहानगरपालिका–२२ चकरी बस्ने नरेश बम, हिरामान थिङ र सुरेश स्याङतान छन्।
जितपुर सिमरा उपमहानगरपालिका–१ पथलैया चोकमा चेकजाँचको क्रममा अमलेखगञ्जबाट पथलैयातर्फ आउँदै गरेको ना २ ह ४९५० नम्बरको अटो भाग्ने क्रममा प्रहरीले पिछा गरी समातेको थियो।
चेकजाँचका क्रममा अटोभित्रबाट लुकाई छिपाई ल्याएको अवस्थामा १२ किलो गाँजा बरामद गरिएको बाराका प्रहरी प्रवक्ता पुरुषोत्तमप्रसाद पाण्डेले जानकारी दिए।
गाँजा ओसार पसारमा संलग्न भएको आरोपमा पक्राउ परेका तीनै जनालाई प्रहरी हिरासतमा राखी थप अनुसन्धान भइरहेको उनले बताए। यसैगरी, शनिबार बिहान बाराको जितपुर सिमरा उपमहानगरपालिका–२१ स्थित इलाका प्रहरी कार्यालय अमलेखगञ्ज बाराबाट खटिएको प्रहरी टोलीले चेकजाँचको क्रममा हेटांैडातर्फबाट आएको प्र ३–०३–००१प ३२७६ नम्बरको मोटरसाइकललाई रोक्न खोजेको थियो। मोटरसाइकललाई रोक्न खोज्दा नरोकी भाग्दा प्रहरीले लखेटेपछि जंगलमा मोटरसाइकल र झोला छाडेर उनीहरू फरार भएका थिए।
उनीहरूले छाडेको मोटरसाइकल र झोला चेकजाँच गर्दा सोबाट दुई किलो लागुऔषध अफिम बरामद गरिएको प्रहरी प्रवक्ता पाण्डेले बताए।
मोटरसाइकल र लागुऔषध प्रहरी नियन्त्रणमा रहेको तथा फरार भएका मानिसको खोजी भइरहेको उनले बताए।
