काठमाडौँ – बुधबार भएको प्रतिनिधि सभा बैठकमा सांसद असिम साह निकै भावुक भएर देखा परे। नेपाली चलचित्रमा काम गरेको अनुभव सुनाउँदै सदनमा हुने राजनीतिका बारे सभामुखसामु सुनाए, ‘सदनमा नायक र खलनायक चिन्न गाह्रो भयो सभामुख महोदय।’
पहिलोपटक सदनमा उभिएर आफ्नो मन्तव्य राख्दै गरेका साहले अल्लाहलाईय सम्झिदै आफ्नो विगत पनि सम्झिए। कलाकार तथा सञ्चारकर्मी हुँदाका दिनमा संसदीय अभ्यासलाई नजिकबाट नियालेको र संसद भवनमा बारम्बार आइरहने गरेको सम्झिदै साहले भने, ‘मेरो यो सदनमा उपस्थिति आफैमा एउटा अपवादका रूपमा रहेको छ।’
अभिनय तथा निर्देशन यात्रामा पहिलोपटक अवार्ड संसदभवनमा पाएको बताएको सम्झिँदै आफूलाई संसद भवनका कुर्ची र भित्ताहरूले जालझेल षडयन्त्रबाट बँच्न र जनताको आवाज बोल्न खबरदारी गरेको बताए।
‘अहिलेका युवा पुस्ताले राजनीतिलाई षडयन्त्र र जालझेलको खेल नबुझुन ‘डामाडोल’ देशलाई सही ट्रयाकमा ल्याउन जरुरी छ’, उनले भने, ‘देश बनाउन डामाडोल चलचित्र छोडेर सभापती रवि लामिछानेको होस्तेमा हैसे गर्दै म यो सदनसम्म आइपुगेको हुँ तर सदनमा आइपुगेपछि थाहा भयो यहाँ त अर्को रोमाञ्चक राजनीतिक चलचित्र चलिरहेको छ।
चलचित्रमा पात्रहरू स्पष्ट हुने र नायक तथा खलनायक पनि स्पष्ट रूपमा चिनिने बताउँदै भने, ‘नायक र खलनायक चिन्न गाह्रो भयो सभामुख महोदय।’
अस्तिसम्म नायकजस्ता देखिने पात्र खलनायकजस्तो र खलनायक जस्तो देखिने पात्र नायकजस्तो पो देखिन थालेको देखेर आश्चर्य मानेको बताए साहले।
उनले राष्ट्रिय स्वतन्त्र पार्टीका सभापति रवि लामिछानेको बचाउँ गर्दै भने, ‘एउटा हाम्रो पात्रलाई यसरी डाँडा कटाइएको छ मनौ ऊ कहिल्यै पनि फर्किएर आउँदैन । तर अहिले त मध्यान्तर पनि भइसकेको छैन सभामुख महोदय, हाम्रो पात्र फर्किएर आउँछ।’
नेपाली चलचित्रको पटकथा र निर्देशकको उदाहरण दिदै सदनमा हुने राजनीतिको असली लेखक तथा निर्देशक चिनाइदिन सभामुखलाई अनुरोध गरे ।
‘राष्ट्रिय हुन कि अन्तर्राष्ट्रिय हुन् रु ती राजनीतिक लेखक तथा निर्देशक चिनाइदिन सभामुख समक्ष अनुरोध गरे साहले।
सांसद साहले चलचित्र जस्तो भए पनि मौलिकता हुनुपर्छ । कथा पनि माटो सुहाउँदो हुनुपर्छ र नेपालीले नै लेखेको हुनुपर्छ भन्ने उदाहारण दिदै राजनीति पनि संयोगान्त हुनुपर्ने र जनताको हितको पक्षमा हुनुपर्ने आशा सुनाए ।
अन्तिममा साहले भने, ‘संसदमा बायोमेट्रियक हाजिरीको व्यवस्था होस ता कि जनप्रतिनिधिलाई पनि सदनमा जवाफदेही हुने गरी देख्न पाइयोस् ।’
