काठमाडौं उपत्यकाका सडक खाल्डाखुल्डीमुक्त बनाउन उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले विशेष पहल थालेका छन् । मन्त्री श्रेष्ठले बुधबार मन्त्रालयका सचिव गोपालप्रसाद सिग्देलसहित सरोकारवाला पक्षसँग छलफल गर्दै एक महिनाभित्र सबै सडक खाल्डाखुल्डीमुक्त हुनुपर्ने बताएका छन् ।
सो अवसरमा उनले सडक विभागका महानिर्देशक अर्जुनजङ्ग थापा, उपत्यकाका तीन वटै सडक डिभिजनका प्रमुख, काठमाडौं महानगरपालिकाका मेयर बालेन्द्र शाह (बालेन), ललितपुर महानगरपालिकाका मेयर चिरिबाबु महर्जन, काठमाडौं उपत्यका विकास प्राधिकरणका आयुक्त जानुका ढकाल, अधिकारसम्पन्न बागमती सभ्यता एकीकृत विकास समितिका अध्यक्ष उद्धवप्रसाद तिमल्सिनालगायतका सरोकारवालासँग छलफल गरेका हुन् ।
छलफलमा उपप्रधानमन्त्री श्रेष्ठले काठमाडौं उपत्यकाका सडक कस–कसको स्वामित्वको हो, त्यसको पहिचानगरी सम्बन्धित पक्षले सडकको अवस्था निक्र्यौल गरी गुणस्तरीय बनाउनुपर्नेमा जोड दिए । सडकमा समस्या भए वा मर्मत गर्नुपर्ने भए सम्बन्धित निकायले तुरुन्तै काम गर्नुपर्ने श्रेष्ठको भनाइ छ ।
कार्यक्रममा काठमाडौँका मेयर बालेनले मन्त्रालय, सडक विभागलगायत अन्य निकायसँग समन्वय गर्न आफू तयार रहेको बताए । सडकलाई काठमाडौं महानगरपालिकाले प्राथमिकतामा राखेको उनको भनाइ छ । मन्त्रालयको अग्रसरतामा ऐक्यबद्धता जनाउँदै महानगरको मातहतमा रहेका सडकको खाल्डाखुल्डी पुर्न आफू तयार रहेको उनले प्रतिवद्धता जनाए ।
ललितपुर महानगरपालिकाका मेयर चिरिबाबु महर्जनले भने सार्वजनिक खरिद ऐन, २०६३ मा आमूल परिवर्तन गर्नुपर्नेमा जोड दिए । महानगरले गुणस्तरलाई ध्यान दिएको उल्लेख गर्दै मेयर महर्जनले मन्त्रालयले थालेको काममा सहयोग गर्न ललितपुर महानगरपालिका तयार रहेको बताए ।
