काठमाडौं । नेपालको काठमाडौं–११ फुटबल टिमले आज स्पेनको कासेरेन्यो क्लबविरुद्ध खेल्दैछ । यी दुई टोलीबीचको म्याच साँझ साढे ५ बजेदेखि त्रिपुरेश्वरस्थित दशरथ रंगशालामा हुनेछ । नेपाल भ्रमणमा रहेको कासेरेन्यो लगातार दोस्रो जितको खोजीमा छ । उसले पहिलो खेलमा बिहीबार गण्डकी एघारालाई ३–० ले हराएको थियो ।
काठमाडौं–११ पूर्वस्टार खेलाडीआबद्ध कासेरेन्योलाई हराउँदै सुखद नतिजा निकाल्न चाहन्छ । कासेरेन्योमा स्पेनिस राष्ट्रिय टिमका पूर्वखेलाडी रुबेन डे ला रेड र युलियो सालिनास पनि छन् । काठमाडौं–११ को कप्तानी नेपाली राष्ट्रिय टिमका पूर्वकप्तान विराज महर्जनले गर्नेछन् । त्यस्तै, काठमाडौं–११ बाट नवयुग श्रेष्ठ, विमल घर्तीमगर, अनन्त तामाङ, आयुष घलानलगायतले पनि खेल्ने बताइएको छ ।
काठमाडौं–११ को प्रशिक्षकमा मेघराज केसी रहेका छन् । लुम्बिनी गार्डेन फाउन्डेसनले नेपालमा दुई मैत्रीपूर्ण खेल खेल्नका लागि स्पेनको दोस्रो डिभिजनको क्लब नेपाल ल्याएको हो । हालै भएको किंग्स कपमा त्यहाँको ‘ए’ डिभिजन क्लबलाई हराएको थियो । यो क्लबले आगामी जनवरी ३ मा रियल मड्रिडसँग कोपा डेल रेमा भिड्दै छ ।
युरो कप खेलिकसकेका व्यावसायिक खेलाडी यो टिममा छ । क्लबका प्रशिक्षक जुलियो कोबोसले रियल मड्रिडसँगको आफ्नो खेलको लागि पूर्व तयारीस्वरूप पनि नेपालमा मैत्रीपूर्ण खेल खेलिरहेको बताए । बुधबार पोखरा रंगशालास्थित फुटबल मैदानमा भएको खेलमा कासेरेन्योको जितमा कारमेलो, बेरमु र स्पेनका पूर्व राष्ट्रिय खेलाडी माइकल कारलेरोले एक/एक गोल गरेका थिए । काठमाडौं–११ र कासेरेन्यो सीपीबीचको खेल पनि नेपाल टेलिभिजनले प्रत्यक्ष प्रसारण गर्नेछ ।
