काठमाडौँ – सत्तारुढ गठबन्धनको बैठक बिना निष्कर्ष सकिएको छ। प्रधानमन्त्रीको सरकारी निवास बालुवाटारमा हिजो शनिबार बसेको बैठक आगामी सरकार गठबन्धनभित्रका दलहरुमध्येबाट कसले पहिला बनाउने भन्ने निष्कर्ष बिना नै सकिएको हो।
बैठकपछि सञ्चारकर्मीहरुसँग कुरा गर्दै सञ्चार तथा सूचना प्रविधिमन्त्री ज्ञानेन्द्रबहादुर कार्कीले जनताले प्रकट गरेको अभिमतलाई सम्मान गर्दै अघि बढ्ने कुरामा सहमति भएको जनाएका थिए ।
उनले भने, ‘जनताले प्रकट गरेको अभिमतलाई सम्मान गर्दै अघि बढ्ने कुरामा पनि हामी सहमतिमा पुगेका छौँ। बैठक भोलि फेरि बस्नेछ। भोलि हामीले निर्णय सुनाउने छौँ। आज धेरै विषयमा गम्भीर रुपले छलफल भयो। छलफल सकारात्मक रुपले अघि बढेको छ। अहिलेको राजनीतिक परिस्थितिको बारेमा छलफल गरेका छौँ।
जनताको अभिमतलाई सम्मान गर्दै अघि बढ्ने कुरामा सहमति भएको छ। प्रधानमन्त्री को पहिला हुने भन्नेकुरा गौण हो। मुलुकलाई जनताको आकांक्षाअनुसार अघि बढ्ने ठूलो कुरा हो। गठबन्धनकै नेतृत्वमा सरकार बन्छ। जनताको शान्ति, विकास र समृद्धिको चाहनालाई पूरा गर्ने दिशातर्फ एकजुट भएर अघि बढ्ने बारेमा छलफल भएको छ।’
मन्त्री कार्कीले जनताको आकांक्षालाई गठबन्धनको सरकार बनाएर तीव्र गतिले अघि बढाएर लैजाने जनाए।
सरकार गठनका लागि राष्ट्रपति विद्यादेवी भण्डारीले आइतबार साँझ ५ बजेसम्मको समय दिएकी छिन्।
