काठमाडौँ- प्रतिनिधिसभा सदस्यहरुको बिहीबार हुने शपथमा २ दर्जनभन्दा बढी सांसदले नेपालीबाहेकका भाषामा शपथ लिन निवेदन दिएका छन्।
नेपाली बाहेकका भाषामा शपथ लिन चाहनेले बिहीबार बिहान ११ बजेसम्म निवेदन दिन सक्नेछन्। संघीय संसदका प्रवक्ता रोजनाथ पाण्डेका अनुसार बुधबार बेलुकासम्म २६ जना सांसदले नेपालीबाहेकका भाषामा शपथ लिन निवेदन दिएका छन्।
नेकपा एमालेका राज अहमद फारुकीले उर्द भाषामा शपथ लिन चाहेका छन् भने नेकपा माओवादी केन्द्रका हितबहादुर तामाङ, मिना तामाङ र सूर्यमान तामाङले तामाङ भाषामा शपथ लिन चाहेका छन्। स्वतन्त्र सांसद किरणकुमार साहले संस्कृत भाषामा शपथ लिने चाहना देखाएका छन् भने राष्ट्रिय स्वतन्त्र पार्टीका सांसद असिम शाहले नेपाली र मुस्लिम भाषामा शपथ लिनेछन्। रास्वपाकै सांसद लक्ष्मी तिवारीले अवधि, मनीष झाले मैथिली, सुमना श्रेष्ठले नेपाल भाषामा शपथ लिने चाहना देखाएका छन्। माओवादी केन्द्र र नेपाल समाजवादी पार्टीबाट चुनाव लडेका महिन्द्र राय यादवले हिन्दी र उमरावती देवी यादवले भोजपुरी भाषामा शपथ लिने चाहना देखाएका छन्।
राप्रपाका अशोक कुमार चौधरी, नागरिक उन्मुक्ति पार्टीका रञ्जिता श्रेष्ठ, अरुणकुमार चौधरी र गंगाराम थारु तथा स्वतन्त्र सांसद लालवीर चौधरी गरी ५ जनाले थारु भाषामा शपथ लिनेछन् । जनमत पार्टीका सोनु मुर्मुले सन्थाली भाषामा शपथ लिनेछन् भने जनमत पार्टीका चन्द्रकान्त राउत, बिनिताकुमारी सिंह र अनिता देवीले मधेशमा बोलिनेमध्ये कुनै भाषामा शपथ लिने बताएका छन्।
