काठमाडौँ – डा. शेखर कोइरालाले कांग्रेस संसदीय दलको नेतामा प्रतिस्पर्धा गर्ने भएका छन्।
प्रधानमन्त्री ‘प्रि इलेक्सन’का रुपमा मान्न सकिने कांग्रेस संसदीय दलको नेतामा कोइरालाले उम्मेदवारी दिने भएका हुन्। कोइराला गत मंसिर ४ गते भएको चुनावमा मोरङ ६ बाट निर्वाचित भएका छन्।
संस्थापन इतर समूहबाट गगन थापाले यसअघि नै दलको नेतामा प्रतिस्पर्धा गर्ने घोषणा गरिसकेका छन्। अहिलेसम्म मौन बस्दै आएका डा. कोइराला थापालाई समथर्न नगरी आफैँ चुनावमा उठ्ने भएका हुन्।
संस्थापन पक्षबाट सभापति शेरबहादुर देउवा नै दलको नेतामा उम्मेदवारी दिने तयारीमा छन्। गत वर्ष भएको पार्टीको महाधिवेशनमा देउवा र कोइरालाबीच नै प्रतिस्पर्धा भएको थियो।
शुक्रबार गृहनगर विराटनगरबाट संसदीय दलको नेतामा प्रतिस्पर्धा गर्ने औपचारिक घोषणा गर्ने तयारी गरे पनि मौसमका कारण रोकिएको छ। काठमाडौँबाट दोस्रो फ्लाइटमा बिहान ९ः२० बजे विराटनगर पुगेर आफ्नै निवासबाट चुनाव लड्ने घोषणा गर्ने तयारीमा रहेका कोइराला खराब मौसमका कारण काठमाडौँमै रोकिए।
गिरिजाप्रसाद कोइरालाले कुनै महत्वपूर्ण निर्णय गर्नुअघि गृहनगर विराटनगर पुग्ने शैली शेखरले पनि अपनाउन खोजेका थिए।
विमान नै उठ्न नपाएपछि रोकिएका कोइरालाको शुक्रबारका लागि बुढीगंगा गाउँपालिकामा आयोजित एक कार्यक्रममा पनि जान नपाउने भएका छन्।
उनका स्वकीय सचिव दिनेश थपलियाले भनेका छन्, ‘विराटनगर विमानस्थलको खराब मौसमका कारण जहाज नउडेकाले नेपाली कांग्रेसका नेता डा. शेखर कोइराला बुढीगंगा गाउँपालिका वडा नं ६ नारायण मावि को कार्यक्रममा सहभागी हुन नसक्नुहुने जानकारी गराउँदछु।’
मोरङ १ बाट चुनाव जितेका कोइराला पक्षका डिगबहादुर लिम्बुले संस्थापन इतर समूहबाट दलको नेताको उम्मेदवार डा. कोइराला नै भएको दाबी गरे। उनले भने, ‘हामी छलफलमै छौँ। दलको नेतामा डा. कोइरालाको विकल्प छैन।’
गगन थापाले संसदीय दलको नेता उठ्नेबारे आफूहरुसँग छलफल नै नगरेको लिम्बुको भनाइ छ। ‘गगनजीले हामीसँग छलफल गर्नुभएको छैन। हाम्रो पक्षबाट पहिलो नेता डा. कोइराला नै हुनुहुन्छ। उहाँ नै उठ्नुहुन्छ, लिम्बुले अगाडि भने, ‘गगनजी दोस्रो नेता हो।’
प्रतिनिधिसभामा कांग्रेसले ८९ सिट जितेको छ। कोइराला पक्षले आफूसँग कम्तिमा ३० देखि ३५ सांसद रहेको दाबी गरेको छ।
