काठमाडौं । फाइनप्रिन्टद्वारा प्रकाशित गोविन्द गिरी प्रेरणा लिखित ‘सुश्री पारिजात’ एक समारोहकाबीच सार्वजनिक गरिएकाे छ ।
बिहीबार नेपाल प्रज्ञा–प्रतिष्ठानको डबलीमा साहित्यकार भुवन ढुङ्गाना, श्रीओम श्रेष्ठ रोदन र कृतिकार प्रेरणाले कृति सार्वजनिक गरे ।कार्यक्रमकी वक्ता भुवन ढुङ्गानाले साहित्यकार पारिजातसँग आफ्नो परिचय २०२६ सालमा भएको उल्लेख गर्दै ‘पारिजातले सङ्घर्षपूर्ण जीवन जिउँदै हामीजस्ता धेरै साहित्यकारलाई प्रेरणा दिएको’ बताइन् ।
ढुङ्गानाले भनिन्, “पारिजातले मलाई सधैँ ‘लेख्न नछोड्नु है बहिनी’ भन्नुहुन्थ्यो । यो मेरा लागि मूलमन्त्र थियो । पारिजातलाई चिन्न खोज्ने, बुझ्न खोज्ने र पढ्न खोज्नेले प्रेरणाजीको यो पुस्तक पढ्नै पर्छ ।”
उनले पारिजातको जीवनमाथि अरू पनि कृति लेखिएको तर यो पुस्तक पृथक रहेको पनि बताइन् ।
अर्का वक्ता श्रीओम श्रेष्ठ रोदनले कृतिकार प्रेरणाको परिचय दिँदै बितेको २० वर्षदेखि उनले यस पुस्तकमा काम गर्दै आएको बताए । उनले प्रेरणाले कथा, कविता, निबन्ध, नियात्रा सबै विधामा कलम चलाएको बताउँदै यस पुस्तकको प्रकाशनसँगै उनी जीवनीकार पनि भएको उल्लेख गरे ।
सार्वजनिक पुस्तक ‘सुश्री पारिजात’का लेखक गोविन्द गिरी प्रेरणाले आफूले शंकर लामिछाने, भूपि शेरचन र पारिजातको जीवनी लेख्ने निर्णय गर्दै सर्वप्रथम पारिजातमाथि अनुसन्धान गर्दै काम सुरु गरेको बताए ।
२० वर्ष लगाएर लेखेको यस पुस्तकलाई अब पाठकको जिम्मामा सुम्पिएको उनले बताए ।
