काठमाडाैं । सोमबार पनि नेप्से परिसूचक दोहोरो अंकले घटेको छ। नेप्से १०.९८ अंकले घटेर २६७७.३२ विन्दुमा बन्द भएको हाे।
यसदिन कारोबार रकम पनि अघिल्लो दिनको तुलनामा घटेको छ। गत कारोबार दिन अर्थात् आइतबार आठ अर्ब ३८ करोडको कारोबार भएकोमा सोमबार ६ अर्ब ९६ करोडको सेयर कारोबार भएको छ।
अघिल्लो दिनको तुलनामा कारोबार रकममा एक अर्ब ४२ करोड रूपैयाँ कमी आएको हो। साेमबार ३२२ वटा धितोपत्रको एक करोड ४४ लाख ४३ हजार ७६५ कित्ता सेयर किनबेच भएको हो।
सोमबार ७७ कम्पनीको सेयर मूल्य बढेको छ भने १६१ वटाको घटेको छ। यस्तै ६ कम्पनीको मूल्य स्थिर रहेको छ। यसदिन न्यादी हाइड्रोपावर र गार्डियन माइक्रो इन्स्योरेन्सको सेयर मूल्य सर्वाधिक १० प्रतिशतले बढेको छ।
उक्त कम्पनीको प्रतिकित्ता मूल्य क्रमशः ८१४ रूपैयाँ र ३६४ रूपैयाँ २० पैसा पुगेको छ। यस्तै, बोटलर्स नेपाल बालाजु र उपकार लघुवित्तको सेयर मूल्य सर्वाधिक १० प्रतिशतका दरले घटेको छ।
उक्त कम्पनीको प्रतिकित्ता मूल्य १७ हजार ६०४ रूपैयाँ र पाँच हजार ६७० रूपैयाँ कायम भएको छ। सोमबार नेपाल रिपब्लिक मिडियाको सर्वाधिक कारोबार भएको छ।
कम्पनीको प्रतिकित्ता मूल्य एक हजार ६०३ रूपैयाँमा २४ करोड ४४ लाख रूपैयाँको सेयर कारोबार भएको छ।
यो मूल्य अघिल्लो दिनको तुलनामा ८।८४ प्रतिशत बढेको हो। सर्वाधिक सेयर खरिद–बिक्री हुने दोस्रो कम्पनीमा सिइडिबी होल्डिङ्स रहेको छ। उक्त कम्पनीको प्रतिकित्ता दुई हजार ४० रूपैयाँमा १५ करोड ३८ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये अन्य र व्यापार समूहको परिसूचक १ प्रतिशतभन्दा कमले बढेको छ भने बाँकी सबै समूहको परिसूचक घटेको हो। यसदिन उत्पादन तथा प्रशोधन समूहको परिसूचक सर्वाधिक २।०७ प्रतिशतले घटेको छ।
यस्तै, वित्त समूहको परिसूचक १.२३ प्रतिशतले घटेको छ।
