काठमाडौं । फ्रान्समाथि २-० को जित निकाल्दै स्पेन युइएफए महिला नेसन्स लिगको पहिलो संस्करणमा च्याम्पियन बनेको छ ।
घरेलु मैदान ला कार्तुजा डि सेभिया रंगशालामा बुधबार राति स्पेनलाई जित दिलाउन अइटाना बोन्मती र मारियोना काल्डेन्टीले गोल गरे । खेलको ३२ औं मिनेटमा बोन्मतीको गोलमार्फत स्पेनले अग्रता लिएको थियो ।
उनले ओल्गा कार्मोना गार्सियाको पासलाई सदुपयोग गरेकी हुन् । ५३औं मिनेटमा काल्डेन्टीले टोलीको अग्रता दोब्बर बनाइन् । उनले एथेनिया डेल कास्टिलोको पासलाई पोस्टको दिशा दिइन् ।
त्यसपछि थप गोल निस्कन नसक्दा स्पेन २-० को जित निकाल्दै च्याम्पियन बन्यो । स्पेनले ६ महिनाको अन्तरालमा जितेको योल दोस्रो ठूलो उपाधि हो ।
यसअघि स्पेन गत अगस्टमा इङ्ल्यान्डलाई पराजित गर्दै फिफा महिला विश्वकपको च्याम्पियन बनेको थियो । यसैगरी नेदरल्यान्ड्सलाई २-० ले हराउँदै जर्मनीले तेस्रो स्थान हासिल गर्यो ।
