काठमाडाैं । विनोद पौडेल निर्देशित कथानक चलचित्र ‘भूठान’: द वर्ल्ड ह्यापियस्ट म्यानको छायाङ्कन सकिएको छ ।
मंगलबार अमेरिकाको ओहियो राज्यमा फिल्म ‘प्याकअप’ गरिएको हो । छायाङ्कन सकिएसँगै निर्माण टिमले उपलब्ध गराएको तस्बिरहरूमा हलिउड अभिनेता ब्रुस डर्न र दयाहाङ राईको एकसाथ छायाङ्कन भएको देखिन्छ । दयाहाङ अमेरिकी आर्मीको पोसाकमा छन् ।
चलचित्रमा दयहाङ र ब्रुसको अलावा हरिवंश आचार्य, पूजा चन्द लामा, रिचा घिमिरे, भुवन प्याकुरुल, अदिति प्याकुरेल, जोयश पाण्डे, विमल सुवेदी, कौशिला खनाल कर्माचार्यका साथै भारतबाट अनुराधा मजुमदारको पनि अभिनय छ ।
चलचित्रको कार्यकारी निर्मातामा कौशिला खनाल कर्माचार्य, एल.एन अधिकारी, अपार श्रेष्ठ र रमेश भट्ट छन् भने निर्मातामा राजेन्द्र ठकुराठी, अभिताव जोशी र अविरल थापा छन् ।
‘भूठान’ हलिउडकै अन्तर्राष्ट्रिय मान्यता र मापदण्डमा रहेर निर्माण भएको निर्देशक पौडेल जनाउँछन् । उनले चलचित्रको कथा पनि विश्वले आत्मसाथ गर्ने भएको जानकारी दिए ।
चलचित्रको निर्माणमा म्याड मंकी फिल्मस्, हलिउडको भ्याकेन्ट लाइट, एभरेष्ट इन्टरटेनमेन्ट, ठकुराठी ब्रोस र नेपालबाट अवेकन प्रोडक्सन जस्ता कम्पनीले सहकार्य गरेका छन् ।
२०२४ को अन्त्यसम्म प्रदर्शनको लक्ष्य राखिएको यो फिल्म सन् २०१९ मा भुसान फिल्म फेस्टिभलको स्कृप्ट पिचिङ्गमा छानिएको थियो । सुसन प्रजापतिले खिचेको चलचित्र नेपाली तथा अंग्रेजी भाषामा निर्माण गरिएको हो ।
