काठमाडौं । काठमाडौं महानगरपालिकास्तरीय राष्ट्रपति रनिङ शिल्ड खेलकूद प्रतियोगितामा १२ स्वर्ण पदकसहित विश्व निकेतन माध्यमिक विद्यालय च्याम्पियन बनेको छ। विभिन्न खेलमा विद्यालयले १२ स्वर्णसहित २ रजत र २ कास्य गरी १६ पदक प्राप्त गरेको हो ।
राष्ट्रपति रनिङ शिल्ड: काठमाडौं महानगरबाट १०१ खेलाडी छानिए प्रतियोगितामा ६ स्वर्ण, ३ रजत र ४ कास्य पदक प्राप्त गर्दै पद्मकन्या माध्यमिक विद्यालय डिल्लीबजार दोस्रो भएको छ भने ५ स्वर्ण, १३ रजत र ५ कास्य पदक गर्दै बिजेश्वरी ज्ञान मन्दिर सैनिक महाविद्यालय तेस्रो भएको छ ।
प्रतियोगिताअन्तर्गत जिल्लास्तरीय प्रतियोगिताका लागि काठमाडौं महानगरपालिकाबाट उत्कृष्ट १०१ जना खेलाडी छनोट भएका छन् । प्रतियोगितामा प्रथम, द्धितीय र तृतीय हुनेहरूलाई महानगरपालिकाले क्रमशः ५० हजार, ४० हजार र ३० हजार रुपैयाँसहित मेडल र प्रमाण पत्र प्रदान गरेको छ ।
प्रतियोगितामा ५ स्वर्ण, १ रजत र १ कास्य पदक हासिल गर्ने ज्ञानोदय माध्यमिक विद्यालय सान्त्वाना घोषित भयो । उनीहरूलाई शुक्रबार डिल्लीबजारस्थित पदमकन्या माविमा एक कार्यक्रमका बीच उपमेयर सुनिता डंगोल, सामाजिक समितिका संयोजक रामकुमार केसी र निमित्त प्रमुख प्रशासकीय अधिकृत एवं शिक्षा अधिकारी सीताराम कोइरालाले संयुक्तरुपमा नगद, पदक र शिल्डसहित पुरस्कृत गरे । जिल्लास्तरीय प्रतियोगिताका लागि महानगरपालिकाबाट भलिबल छात्रतर्फ २० जना र छात्रातर्फ २० जना, एथलेटिक्समा २८ जना, तेक्वान्दो, उसु र कराँतेमा १२-१२ जना खेलाडी छानिएका हुन् ।
प्रतियोगितामा करिब ५० वटा विद्यालय सहभागी थिए । खेलमा ३ हजार २५० जना छात्रछात्रा खेलाडीले भाग लिएका थिए ।
